ന്യൂഡൽഹി : ഇന്ത്യ 77-ാമത് സ്വാതന്ത്ര്യ ദിനം ആഘോഷിക്കാനുള്ള ഒരുക്കത്തിലാണ്. സ്വാതന്ത്ര്യദിനാഘോഷങ്ങളുടെ തത്സമയ സംപ്രേക്ഷണത്തിനായി പ്രസാർ ഭാരതി അഞ്ച് റോബോട്ടിക് ക്യാമറകൾ ഉൾപ്പെടെ 41 അതിനൂതന ക്യാമറകൾ ആണ് വിന്യസിച്ചിട്ടുള്ളത്. പ്രധാനമന്ത്രി നരേന്ദ്രമോദി ചെങ്കോട്ടയിൽ ദേശീയ പതാക ഉയർത്തുന്നത് അടക്കമുള്ള സ്വാതന്ത്ര്യ ദിനാഘോഷ ചടങ്ങുകൾ നാളെ അതീവമിഴിവോടെ പ്രസാർ ഭാരതി ജനങ്ങളിലേക്ക് എത്തിക്കും.
രാവിലെ പ്രധാനമന്ത്രി രാജ്യത്തെ അഭിസംബോധന ചെയ്യുന്ന ചെങ്കോട്ട വളപ്പിൽ 36 ക്യാമറകൾ സ്ഥാപിച്ചിട്ടുണ്ടെന്ന് പ്രസാർ ഭാരതി അറിയിച്ചു. പ്രധാനമന്ത്രി നരേന്ദ്ര മോദി മഹാത്മാഗാന്ധിക്ക് ആദരാഞ്ജലി അർപ്പിക്കുന്ന രാജ്ഘട്ടിൽ അഞ്ച് ക്യാമറകൾ ആണ് വിന്യസിച്ചിട്ടുള്ളത്. ദൂരദർശനിലും അതിന്റെ പ്രാദേശിക ചാനലുകളിലും ആകാശവാണിയുടെ ദേശീയ ചാനലുകളിലും സ്വാതന്ത്ര്യദിനാഘോഷങ്ങൾ സംപ്രേക്ഷണം ചെയ്യും. ക്യാമറകൾ നിയന്ത്രിക്കുന്നതിനായി രണ്ടു വനിതകൾ അടക്കമുള്ള പ്രവർത്തകരും തയ്യാറെടുത്തു കഴിഞ്ഞു.
2021 മാർച്ച് 12 ന് അഹമ്മദാബാദിലെ സബർമതി ആശ്രമത്തിൽ നിന്ന് പ്രധാനമന്ത്രി ആരംഭിച്ച ‘ആസാദി കാ അമൃത് മഹോത്സവ്’ ആഘോഷങ്ങളുടെ സമാപനവും ഈ വർഷത്തെ സ്വാതന്ത്ര്യദിനത്തിന് കാണാൻ കഴിയുന്നതാണ്. ദൂരദർശന്റെ എല്ലാ ചാനലുകളിലും സ്വാതന്ത്ര്യദിനാഘോഷ പരിപാടികളുടെ തൽസമയ സംപ്രേക്ഷണവും ഒപ്പം ആംഗ്യഭാഷ വിവർത്തനവും ഉണ്ടായിരിക്കുന്നതാണ്.
Discussion about this post