ന്യൂഡൽഹിയിൽ നടക്കുന്ന പതിനെട്ടാമത് ബ്രിക്സ് ഉച്ചകോടിയിൽ പങ്കെടുക്കാൻ റഷ്യൻ പ്രസിഡന്റ് വ്ലാഡിമിർ പുടിൻ ഇന്ത്യയിലെത്തുന്നതിന് മുന്നോടിയായി മൂന്ന് റഷ്യൻ സൈനിക വിമാനങ്ങൾ നോയിഡ അന്താരാഷ്ട്ര വിമാനത്താവളത്തിൽ ഇറങ്ങി. പുലർച്ചെ അഞ്ചരയോടെ റൺവേ തൊട്ട വിമാനങ്ങളിൽ റഷ്യയുടെ അത്യാധുനിക ഐഎൽ-76 ട്രാൻസ്പോർട്ട് വിമാനവും ഉൾപ്പെടുന്നു. റഷ്യൻ സൈനിക ഉദ്യോഗസ്ഥരും മുൻകൂട്ടി എത്തിയ പ്രത്യേക സുരക്ഷാ സംഘവുമാണ് ഈ വിമാനങ്ങളിൽ ഇന്ത്യയിലെത്തിച്ചേർന്നത്. പുതിയതായി പ്രവർത്തനമാരംഭിച്ച നോയിഡയിലെ ജെവാർ വിമാനത്താവളത്തിൽ ഇറങ്ങുന്ന ആദ്യ വിദേശ വിമാനങ്ങൾ കൂടിയാണ് ഇവ.
ഉച്ചകോടിക്ക് തൊട്ടുമുമ്പ് റഷ്യൻ പ്രസിഡന്റ് വ്ലാഡിമിർ പുടിനും ഇന്ത്യൻ പ്രധാനമന്ത്രി നരേന്ദ്ര മോദിയും തമ്മിൽ ഉഭയകക്ഷി ചർച്ചകൾ നടത്തും. ഇരുരാജ്യങ്ങളും തമ്മിലുള്ള വ്യാപാരം, സാമ്പത്തിക സഹകരണം, സുരക്ഷ തുടങ്ങിയ പ്രധാന വിഷയങ്ങൾ ഈ കൂടിക്കാഴ്ചയിൽ ചർച്ചയാകും. വിദേശ രാജ്യങ്ങളിൽ നിന്നുള്ള വിവിഐപി വിമാനങ്ങൾ സാധാരണയായി ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിലാണ് ഇറങ്ങാറുള്ളത്. എന്നാൽ സുരക്ഷാ ക്രമീകരണങ്ങളുടെ ഭാഗമായി ഇത്തവണ നോയിഡ വിമാനത്താവളവും ഇതിനായി ഉപയോഗിക്കുകയായിരുന്നു.
ഉച്ചകോടിയുടെ ഭാഗമായി ലോക നേതാക്കളും പ്രമുഖ പ്രതിനിധികളും എത്തുന്നതിനാൽ തലസ്ഥാനത്ത് കനത്ത സുരക്ഷയാണ് ഏർപ്പെടുത്തിയിരിക്കുന്നത്. ഭാരത് മണ്ഡപത്തിൽ വെച്ചാണ് ബ്രിക്സ് ഉച്ചകോടിയുടെ പ്രധാന സമ്മേളനങ്ങൾ നടക്കുന്നത്. ഡൽഹിയിലെ വിമാനത്താവളങ്ങൾ, ഹോട്ടലുകൾ, ഉച്ചകോടി വേദി എന്നിവിടങ്ങളിൽ പതിനായിരക്കണക്കിന് സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നത്. രണ്ട് ദിവസം നീണ്ടുനിൽക്കുന്ന ഈ അന്താരാഷ്ട്ര സമ്മേളനം ലോക രാജ്യങ്ങൾക്കിടയിൽ വലിയ പ്രാധാന്യത്തോടെയാണ് വീക്ഷിക്കപ്പെടുന്നത്.
