ന്യൂഡൽഹി : നമ്മൾ തമ്മിൽ പോരടിച്ചാൽ ഇന്ത്യ എങ്ങനെയാണ് ‘വിശ്വഗുരു’ ആകുകയെന്ന് ഡൽഹി മുഖ്യമന്ത്രി അരവിന്ദ് കെജ്രിവാൾ. രാജ്യത്തെ ജനങ്ങൾ സൗഹാർദത്തോടെ ഒരു കുടുംബം പോലെ കഴിയണമെന്നും കെജ്രിവാൾ വ്യക്തമാക്കി. വടക്കൻ ഡൽഹിയിലെ ഛത്രസാൽ സ്റ്റേഡിയത്തിൽ ഡൽഹി ഗവൺമെന്റിന്റെ സ്വാതന്ത്ര്യദിന പരിപാടിയിൽ സംസാരിക്കുകയായിരുന്നു അദ്ദേഹം.
ഡൽഹി സർക്കാരിന്റെ സ്വാതന്ത്ര്യ ദിനാഘോഷ ചടങ്ങിൽ പങ്കെടുത്ത കെജ്രിവാൾ തലസ്ഥാനത്തെയും രാജ്യത്തെയും ജനങ്ങളെ അഭിവാദ്യം ചെയ്തു. സ്വാതന്ത്ര്യ സമര സേനാനികൾ, സൈനികർ, വിവിധ മേഖലകളിൽ നേട്ടങ്ങൾ കൈവരിച്ചവർ എന്നിവരെ സ്വാതന്ത്ര്യ ദിനത്തിൽ ഡൽഹി മുഖ്യമന്ത്രി ആദരിച്ചു. ഡൽഹിയിൽ അടുത്തിടെ ഉണ്ടായ വെള്ളപ്പൊക്കത്തിന് കേന്ദ്രസർക്കാരിന്റെ ഭാഗത്തുനിന്നും ഉണ്ടായ സഹായത്തെക്കുറിച്ചും അദ്ദേഹം അനുസ്മരിക്കുകയും പ്രത്യേകം നന്ദി രേഖപ്പെടുത്തുകയും ചെയ്തു.
മണിപ്പൂരിലും ഹരിയാനയിലും നടക്കുന്ന സംഭവങ്ങളിൽ അരവിന്ദ് കെജ്രിവാൾ ദുഃഖം രേഖപ്പെടുത്തി. ഒരു സമുദായത്തിൽ നിന്നുള്ളവർ മറ്റൊരു സമുദായത്തിലെ അംഗങ്ങളുമായി കലഹിക്കുകയും അവരെ കൊല്ലുകയും ചെയ്യുന്നതിൽ അതീവ ദുഃഖം ഉണ്ടെന്ന് അദ്ദേഹം പറഞ്ഞു. ഇങ്ങനെ പരസ്പരം വഴക്കിട്ടാൽ നമുക്ക് എങ്ങനെ വിശ്വഗുരു ആകാൻ കഴിയും ? വിശ്വഗുരു ആകണമെങ്കിൽ രാജ്യത്തെ എല്ലാ ജനങ്ങളും ഒരു കുടുംബം പോലെ സൗഹാർദ്ദത്തോടെ കഴിയണമെന്നും കെജ്രിവാൾ വ്യക്തമാക്കി.
