ന്യൂഡല്ഹി : രാജ്യത്ത് വ്യാജ സിം കാര്ഡുകള് നിയന്ത്രിക്കുന്നതിന്റെ ഭാഗമായി ഇവ നല്കുന്ന ഡീലര്മാര്ക്ക് പോലീസ് വേരിഫിക്കേഷന് നിര്ബന്ധമാക്കി കേന്ദ്ര സര്ക്കാര്. ടെലികമ്മ്യൂണിക്കേഷന് വകുപ്പ് വ്യാവസായിക ആവശ്യങ്ങള്ക്ക് കൊടുത്ത് വന്നിരുന്ന ബള്ക്ക് കണക്ഷനുകള് നല്കുന്നത് നിര്ത്തലാക്കിയെന്നും കേന്ദ്രമന്ത്രി അശ്വിനി വൈഷ്ണവ് പറഞ്ഞു. അതിന് പകരമായി ബിസിനസ് കണക്ഷന് എന്ന പുതിയ ആശയം കൊണ്ടുവരും. രാജ്യ സുരക്ഷ ഉറപ്പ് വരുത്തുന്നതിന്റെ ഭാഗമായാണ് ഇത്തരം നടപടികളെന്ന് അദ്ദേഹം വ്യക്തമാക്കി.
രാജ്യത്ത് അനധികൃതമായി പ്രവര്ത്തിച്ചിരുന്ന 52 ലക്ഷം വ്യാജ മൊബൈല് കണക്ഷനുകള് സര്ക്കാര് വിച്ഛേദിച്ചതായി മന്ത്രി പറഞ്ഞു. കൂടാതെ 67,000 ഡീലര്മാരെ കരിമ്പട്ടികയില് ഉള്പ്പെടുത്തിയിട്ടുണ്ട്. 2023 മെയ് മുതല് വ്യാജ സിമ്മുകള് നല്കി വന്നിരുന്ന 300 ഡീലര്മാര്ക്കെതിരെ രാജ്യത്തുടനീളം കേസുകള് രജിസറ്റര് ചെയ്തിട്ടുണ്ട്. രാജ്യ വിരുദ്ധ പ്രവര്ത്തനങ്ങളില് ഏര്പ്പെട്ടിരുന്ന 66,000 അക്കൗണ്ടുകള് വാട്സ്ആപ്പ് സ്വന്തം നിലയില് ബ്ലോക്ക് ചെയ്തതായയും മന്ത്രി കൂട്ടിച്ചേര്ത്തു.
തട്ടിപ്പുകള് തടയാനായാണ് ഇപ്പോള് സിം ഡീലര്മാരുടെ പോലീസ് വെരിഫിക്കേഷന് നിര്ബന്ധമാക്കിയിട്ടുള്ളത്. ടെലികമ്മ്യൂണിക്കേഷന് വകുപ്പിന്റെ മാനദണ്ഡങ്ങള് ലംഘിക്കുന്ന ഡീലര്മാര്ക്ക് 10 ലക്ഷം രൂപ പിഴ ചുമത്തുമെന്നും അശ്വിനി വൈഷ്ണവ് പറഞ്ഞു. രാജ്യത്ത് മൊത്തമായി 10 ലക്ഷത്തിലധികം സിം ഡീലര്മാര് ഉണ്ട്. അവര്ക്ക് പോലീസ് വെരിഫിക്കേഷന് മതിയായ സമയം നല്കും. വ്യാവസായിക ആവശ്യങ്ങള്ക്കായി കൊടുത്ത് വന്നിരുന്ന ബള്ക്ക് കണക്ഷനുകള് നല്കുന്നത് നിര്ത്തലാക്കിയെന്നും പകരം ബിസിനസ് കണക്ഷന് എന്ന പുതിയ ആശയം കൊണ്ടുവരുമെന്നും മന്ത്രി പറഞ്ഞു. കൂടാതെ, ബിസിനസുകളുടെ കെവൈസി മാത്രമല്ല, സിം കൈമാറ്റം ചെയ്യുന്ന വ്യക്തിയുടെ കെവൈസിയും നിര്ബന്ധമാണെന്ന് മന്ത്രി കൂട്ടിചേര്ത്തു.
Discussion about this post