കോട്ടയം: നെടുങ്കണ്ടം മാവടിയില്‍ വീട്ടില്‍ ഉറങ്ങി കിടന്ന ഗൃഹനാഥന്‍ വെടിയേറ്റ് മരിച്ച സംഭവം കൊലപാതകമെന്ന നിഗമനത്തില്‍ പോലീസ്. നായാട്ട് സംഘത്തിന്റെ വേടിയേറ്റാണ് മരണമെന്നാണ് കരുതുന്നത്. പ്രതികളെന്ന് സംശയിക്കുന്ന മൂന്നു പേരെ പോലീസ് കസ്റ്റഡിയിലെടുത്തിട്ടുണ്ട്. മാവടി സ്വദേശികളായ സജി, ബിനു, മുനിയറ സ്വദേശി വിനീഷ് എന്നിവരാണ് അറസ്റ്റിലായത്.
ചൊവ്വാഴ്ച രാത്രി 11.30 മണിക്കാണ് സംഭവം. മാവടി ഇന്ദിരാനഗറില്‍ പ്ലാക്കല്‍ സണ്ണി എന്നയാളാണ് കൊല്ലപ്പെട്ടത്. 57 വയസ്സായിരുന്നു. നായാട്ടുകാര്‍ വെച്ച വെടി അബദ്ധത്തില്‍ കൊണ്ടതാണെന്നാണ് കരുതുന്നത്. പോസ്റ്റുമോര്‍ട്ടത്തില്‍ സണ്ണിയുടെ ശരീരത്തില്‍ നിന്ന് നാടന്‍ തോക്കിന്റെ തിരകള്‍ കണ്ടെത്തിയിരുന്നു.
വീട്ടില്‍ ഉറങ്ങി കിടക്കുകയായിരുന്ന സണ്ണിയുടെ മുഖത്ത് നായാട്ടുകാര്‍ വെച്ച വെടി ഉന്നം തെറ്റി കൊണ്ടതാണെന്ന് പോലീസ് പറഞ്ഞു. അടുക്കള വാതില്‍ തുളച്ചെത്തിയ തിര സണ്ണിയുടെ നെറ്റിയിലാണ് കൊണ്ടത്. സണ്ണി കിടന്ന കട്ടിലിനരികിലുള്ള വാതിലില്‍ തറച്ച നിലയില്‍ നാടന്‍ തോക്കിന്റെ അഞ്ച് തിരകള്‍ കണ്ടെത്തിയിരുന്നു.
ഏലക്കാടുകളാല്‍ ചുറ്റപ്പെട്ട പ്രദേശത്താണ് വീട്. സംഭവം കൊലപാതകമാണെന്ന് സ്ഥിരീകരിച്ചതോടെ നാട്ടുകാര്‍ പരിഭ്രാന്തിയിലാണ്. പ്രദേശത്ത് കാട്ടുപന്നി, പ്രാവ്, മുയല്‍ തുടങ്ങിയവയെ വേട്ടയാടാന്‍ പുറത്ത് നിന്ന് വരെ ആളുകള്‍ വരാറുണ്ടെന്ന് നാട്ടുകാര്‍ പറയുന്നു.
Discussion about this post