ന്യൂഡല്‍ഹി : ഡല്‍ഹിയില്‍ നിന്നും പൂനെയ്ക്ക് പുറപ്പെടാനിരുന്ന വിസ്താരാ വിമാനത്തില്‍ ബോംബ് വച്ചിട്ടുണ്ടെന്ന ഭീഷണിയെ തുടര്‍ന്ന് സുരക്ഷാ പരിശോധന ശക്തമാക്കി. ഡല്‍ഹി വിമാനത്താവളത്തില്‍ നിന്ന് ഇന്ന് രാവിലെ 7.30 ന്് പൂനെയിലേക്ക് പുറപ്പെടാനിരുന്ന വിമാനമാണ് ഭീഷണിയേ തൂടര്‍ന്ന് റദ്ദാക്കിയത്.
വിമാനത്തില്‍ ബോംബ് വച്ചിട്ടുണ്ടെന്ന് പറഞ്ഞ് വിമാനത്താവളത്തിലേ ജിഎംആര്‍ കോണ്‍ടാക്റ്റ് സെന്ററിന് ഫോണ്‍ കോള്‍ വരികയായിരുന്നു. ഇതേ തുടര്‍ന്ന് വിമാനത്തില്‍ നിന്ന് എല്ലാ യാത്രക്കാരെയും പുറത്തിറക്കി പരിശോധന ആരംഭിച്ചിരുന്നു. എന്നാല്‍ ഡല്‍ഹി പോലീസും സിഐഎസ്എഫും നടത്തിയ വിശദമായ പരിശോധനയില്‍ ഭീഷണി വ്യാജമാണെന്ന് തെളിഞ്ഞു.
ഡല്‍ഹി വിമാനത്താവളത്തിലെ ഐസൊലേഷന്‍ ബേയിലാണ് ഇപ്പോള്‍ വിമാനത്തിന്റെ പരിശോധന നടക്കുന്നത്. വിമാനത്തിനകത്തും പുറത്തും നിന്നും സംശയാസ്പദമായ ഒരു വസ്തുവും കണ്ടെത്തിയിട്ടില്ലെന്ന് സിഐഎസ്എഫും ഡല്‍ഹി പോലീസും വിശദമായി പരിശോധനകള്‍ക്ക് ശേഷം വ്യക്തമാക്കി.
Discussion about this post