ബംഗളൂരു : ഡിജിറ്റല് സാങ്കേതിക മേഖലയില് രാജ്യം വലിയ മുന്നേറ്റം നടത്തുന്നതായി പ്രധാനമന്ത്രി നരേന്ദ്രമോദി. നൂതന സാങ്കേതിക വിദ്യയിലെ ആഗോള പരിഹാരങ്ങള്ക്കുള്ള ഏറ്റവും നല്ല പരീക്ഷണ ലാബാണ് ഇന്ത്യയെന്നും അദ്ദേഹം പറഞ്ഞു. ബംഗളൂരുവില് നടന്ന ജി 20 ഡിജിറ്റല് സാമ്പത്തിക മന്ത്രിതല യോഗത്തെ അഭിസംബോധന ചെയ്യുകയായിരുന്നു പ്രധാനമന്ത്രി. കഴിഞ്ഞ 9 വര്ഷങ്ങളായി ഡിജിറ്റല് സാങ്കേതിക മേഖലയില് രാജ്യം കൈവരിച്ച നേട്ടങ്ങള് എണ്ണി പറഞ്ഞ മോദി, ആരോഗ്യപരമായ ഡിജിറ്റല് ആവാസ വ്യവസ്ഥയുണ്ടാക്കാന് ആഗോളതലത്തില് സമവായമുണ്ടാക്കാനും ജി 20 രാജ്യങ്ങളോട് ആഹ്വാനം ചെയ്തു.
സമഗ്രവും സുസ്ഥിരവുമായ വികസനത്തിനായി സാങ്കേതികവിദ്യ പ്രയോജനപ്പെടുത്തുന്നതിനുള്ള പ്രതിബദ്ധത ഇന്ത്യക്കുണ്ട്. ഇതിനായി നിരവധി ഡിജിറ്റല് സംരംഭങ്ങളാണ് രാജ്യത്ത് നടപ്പാക്കിയിരിക്കുന്നതെന്ന് പ്രധാനമന്ത്രി പറഞ്ഞു. 2015 ല് ആരംഭിച്ച ഡിജിറ്റല് ഇന്ത്യ പദ്ധതിയിലൂടെ രാജ്യത്ത് സുസ്ഥിരമായ വികസനങ്ങള് സൃഷ്ടിക്കാന് സാധിച്ചു. ജെഎഎം ട്രിനിറ്റി (ജന്ധന് ബാങ്ക് അക്കൗണ്ടുകള്, ആധാര്, മൊബൈല്), കോവിന് പോര്ട്ടല്, ആഗോള തത്സമയ പേയ്മെന്റുകളില് യുപിഐയുടെ പ്രധാന പങ്ക്, അടിസ്ഥാന സൗകര്യങ്ങളും ലോജിസ്റ്റിക്സും നിയന്ത്രിക്കാന് ഗതിശക്തി പോര്ട്ടല് തുടങ്ങിയവ ഡിജിറ്റല് ഡൊമെയ്നിലെ ഇന്ത്യയുടെ ശ്രദ്ധേയമായ മുന്നേറ്റങ്ങളാണെന്ന് യോഗത്തില് പ്രധാനമന്ത്രി വ്യക്തമാക്കി.
‘ഡിജിറ്റല് സാങ്കേതിക മേഖലയിലെ ആഗോള പരിഹാരങ്ങള്ക്കുള്ള മികച്ച പരീക്ഷണ കേന്ദ്രമാണ് ഇന്ത്യ. ഇന്ത്യയില് വിജയിക്കുന്ന ഏത് കാര്യവും ലോകത്തെവിടെയും എളുപ്പത്തില് പ്രയോഗിക്കാന് കഴിയും’, മോദി പറഞ്ഞു.
വൈവിധ്യമാര്ന്ന ഇന്ത്യന് സംസ്കാരങ്ങളുടെ പശ്ചാത്തലത്തില് ഭാഷാ തടസ്സങ്ങള് നികത്താന് ലക്ഷ്യമിട്ട് വികസിപ്പിച്ച എഐ ഭാഷാ വിവര്ത്തന പ്ലാറ്റ്ഫോമായ ‘ഭാഷിണി’, സാങ്കേതിക വിദ്യയില് രാജ്യത്തിന്റെ ശ്രദ്ധേയമായ മുന്നേറ്റമാണ് കാണിക്കുന്നത്. ഡിജിറ്റല് ഇന്ത്യ പദ്ധതിയിലൂടെ രാജ്യത്തിന്റെ അടിസ്ഥാന സൗകര്യങ്ങള് വിപുലീകരിക്കുന്നതിനായി സുരക്ഷിതമായ പരിഹാരങ്ങള് വാഗ്ദാനം ചെയ്യുന്നു. എല്ലാവര്ക്കും ഡിജിറ്റല് സാങ്കേതികത്വം ഉറപ്പാക്കുക എന്ന ലക്ഷ്യത്തോടെ സൃഷ്ടിച്ച ഓണ്ലൈന് ഗ്ലോബല് പബ്ലിക് ഡിജിറ്റല് ഗുഡ്സ് റിപ്പോസിറ്ററി – ഇന്ത്യ സ്റ്റാക്സ് പോര്ട്ടല് രാജ്യത്തിന്റെ മറ്റൊരു വികസന നേട്ടമാണെന്നും അദ്ദേഹം ചൂണ്ടിക്കാട്ടി.
സുരക്ഷിതവും വിശ്വസനീയവുമായ ഡിജിറ്റല് ആവാസ വ്യവസ്ഥ കെട്ടിപ്പടുക്കേണ്ടത് ആഗോള തലത്തില് സമ്പദ്വ്യവസ്ഥയുടെ സുരക്ഷിതത്വത്തിന് അനിവാര്യമാണ്. കൂടാതെ ചെറുകിട ബിസിനസ്സുകളെ ഡിജിറ്റലൈസ് ചെയ്യുന്നതിലൂടെ രാജ്യത്തിന്റെ സാമ്പത്തിക വളര്ച്ചയ്ക്കും ഉല്പാദനശഷിക്കും ഗുണം ചെയ്യുമെന്നും പ്രധാനമന്ത്രി അഭിപ്രായപ്പെട്ടു. നിലവില് ലോകം ഉറ്റു നോക്കുന്നത് ആര്ട്ടിഫിഷ്യല് ഇന്റലിജന്സിന്റെ വളര്ച്ചയിലേക്കാണ്. വളരെ വല്യ സാധ്യതകളാണ് ഇവ ലോകത്തിന് മുന്നില് തുറക്കുന്നത്. എന്നാല് അവയെ സുരക്ഷിതമായും ഉത്തരവാദിത്വത്തോട് കൂടിയും ഉപയോഗിക്കുന്നതിനായി ചില ചട്ടക്കൂടുകള് ഉണ്ടാക്കേണ്ടതുണ്ട്. ഇത്തരം ആവാസ വ്യവസ്ഥ രൂപപ്പെടുത്തുന്നതിനായി അന്താരാഷ്ട്ര തലത്തിലുള്ള ഏകോപനവും സഹകരണവും പ്രതിബദ്ധതയും ആവശ്യമാണെന്നും അദ്ദേഹം കൂട്ടിച്ചേര്ത്തു.
Discussion about this post