ഇടുക്കി : ദക്ഷിണേന്ത്യയിലെ ഏറ്റവും വലിയ ഗണപതി ശില്പം കാണാനായി ഇപ്പോൾ സ്വദേശികളും വിദേശികളുമായ ധാരാളം പേരാണ് വന്നെത്തുന്നത് . കേരളത്തിലെ പ്രമുഖ ടൂറിസ്റ്റ് കേന്ദ്രമായ ഇടുക്കിയിലാണ് ദക്ഷിണേന്ത്യയിലെ ഏറ്റവും വലിയ ഗണപതി ശില്പം സ്ഥിതിചെയ്യുന്നത് . ഇടുക്കിയിലെ വണ്ടൻമേട് ശ്രീ മഹാഗണപതി ക്ഷേത്രത്തിന്റെ കാണിക്കവഞ്ചിയോട് ചേർന്നാണ് 38 അടി ഉയരമുള്ള ഗണപതി ശില്പം നിർമ്മിച്ചിട്ടുള്ളത്.
തേക്കടി-മൂന്നാര്‍ റോഡില്‍ ആമയാറിന് സമീപമാണ് ഈ ശിൽപം ഉള്ളത് എന്നതിനാൽ ഇടുക്കി കാണാനെത്തുന്ന സഞ്ചാരികൾക്ക് എല്ലാവർക്കും തന്നെ ഈ ശില്പം കൃത്യമായി കാണാൻ കഴിയുന്നതാണ്. മൂന്നാറിലേക്ക് എത്തുന്ന സഞ്ചാരികൾക്ക് ഏറെ കൗതുകം നൽകുന്ന ഒരു കാഴ്ചയാണ് ഈ ഗണപതി ശില്പം.
ദക്ഷിണേന്ത്യയിലെ ഏറ്റവും വലിയ ഗണപതി ശില്പവും ഇന്ത്യയിലെ രണ്ടാമത്തെ വലിയ ഗണപതി ശില്പവും ആണ് ഇത്.
32 ലക്ഷം രൂപയാണ് ഈ കൂറ്റൻ ശിൽപം നിർമ്മിക്കാൻ ചെലവ് വന്നത്. സിമന്റും കമ്പിയും ഉപയോഗിച്ച് ആയിരുന്നു നിർമ്മാണം. പ്രശസ്ത ശില്‍പി ചേര്‍ത്തല എരമല്ലൂര്‍ ശിവാനന്ദനാണ് ഈ വലിയ ഗണപതി ശില്പം നിർമ്മിച്ചത്. ആറുവർഷം എടുത്താണ് ശിൽപത്തിന്റെ നിർമാണം പൂർത്തിയായത്. 2018 ലായിരുന്നു ശില്പത്തിന്റെ സമർപ്പണച്ചടങ്ങ് നടന്നത്. നിലവിൽ ഈ വഴി കടന്നു പോകുന്ന സഞ്ചാരികളെ ആകർഷിക്കുന്ന ഒരു പ്രധാന കാഴ്ചയാണ് ഈ കൂറ്റൻ ഗണപതി ശില്പം.
