മുംബൈ : മഹാരാഷ്ട്രയിലെ ബുൽധാന ജില്ലയിൽ ഒരു വനിതാ പോലീസുദ്യോഗസ്ഥയേയും മകളെയും വീട്ടിൽ മരിച്ച നിലയിൽ കണ്ടെത്തി. കൃത്യം നടത്തിയത് ഇവരുടെ ഭർത്താവെന്ന് സംശയിക്കുന്നു. യുവതിയുടെ ഭർത്താവിന്റെ മൃതദേഹം വീട്ടിൽ നിന്ന് 15 കിലോമീറ്റർ അകലെയുള്ള ഒരിടത്ത് മരത്തിൽ തൂങ്ങിമരിച്ച നിലയിൽ കണ്ടെത്തിയിട്ടുണ്ട്.
ചിഖ്ലി പോലീസ് സ്റ്റേഷനിൽ ഉദ്യോഗസ്ഥയായ വർഷ ദണ്ഡാഡെ കുട്ടെയും അവരുടെ മൂന്നു വയസ്സുകാരിയായ രണ്ടാമത്തെ മകളുമാണ് കൊല്ലപ്പെട്ടത്. വർഷയുടെ ഭർത്താവ് കിഷോർ കുട്ടെ ഭാര്യയും മകളെയും കൊലപ്പെടുത്തിയ ശേഷം ആത്മഹത്യ ചെയ്യുകയായിരുന്നു എന്നാണ് പോലീസ് പറയുന്നത്. ഈ ദമ്പതികളുടെ മൂത്ത മകൾ സ്കൂളിൽ ആയിരുന്ന സമയത്താണ് കൊലപാതകം നടക്കുന്നത്.
മൂർച്ചയേറിയ വസ്തു ഉപയോഗിച്ചാണ് ഭാര്യയെയും മൂന്ന് വയസുള്ള മകളെയും പ്രതി കൊലപ്പെടുത്തിയിരിക്കുന്നതെന്ന് പോലീസ് പറഞ്ഞു. ചിഖ്ലി നഗരത്തിലെ പഞ്ചമുഖി മഹാദേവ ക്ഷേത്രത്തിന് സമീപമുള്ള വസതിയിലാണ് വർഷ കുട്ടെയെയും മകളെയും മരിച്ച നിലയിൽ കണ്ടെത്തിയത്. ദമ്പതികളായ കിഷോറും വർഷയും തമ്മിൽ നല്ല ബന്ധമായിരുന്നു എന്നാണ് നാട്ടുകാർ അഭിപ്രായപ്പെടുന്നത്. കൊലപാതകത്തിന് പിന്നിലെ കൃത്യമായ കാരണം ഇതുവരെ കണ്ടെത്താനായിട്ടില്ല. ചിഖ്ലി പോലീസ് കേസ് രജിസ്റ്റർ ചെയ്ത് അന്വേഷണം നടത്തുന്നുണ്ട്.
