തിരുവനന്തപുരം : സൂര്യനിലേക്കാണ് ഐഎസ്ആര്ഒയുടെ അടുത്ത ദൗത്യമെന്നും വിക്ഷേപണം സെപ്റ്റംബര് ആദ്യ ആഴ്ചയിലുണ്ടാകുമെന്നും വിഎസ്എസ്സി ഡയറക്ടര് എസ് ഉണ്ണികൃഷ്ണന്. ബഹിരാകാശത്തേക്ക് മനുഷ്യരെ അയയ്ക്കുന്ന ഗഗന്യാന്റെ പരീക്ഷണങ്ങളും തുടര്ന്നുണ്ടാകുമെന്നും അദ്ദേഹം പറഞ്ഞു.
ആദിത്യ L1 എന്ന ഉപഗ്രഹമാണ് സൂര്യനിലേക്കുള്ള ദൗത്യത്തിനായി തയ്യാറെടുക്കുന്നത്. ഭൂമിയില്നിന്നു 15 ലക്ഷം കിലോമീറ്ററുകള് അകലെയുള്ള സൂര്യനെ നിരീക്ഷിക്കുക, സൂര്യന് അന്തരീക്ഷത്തെയും ഭൂമിയിലെ കാലാവസ്ഥയെയും എങ്ങനെ ബാധിക്കുന്നു എന്നു പഠിക്കുക എന്നതാണ് ആദിത്യയുടെ ലക്ഷ്യം. പിഎസ്എല്വി റോക്കറ്റാണ് ദൗത്യത്തിനായി ഉപയോഗിക്കുന്നതെന്നും അദ്ദേഹം കൂട്ടിച്ചേര്ത്തു.
ആദിത്യ L1 ന്റെ വിക്ഷേപണത്തിന് ശേഷം ബഹിരാകാശത്തേക്ക് മനുഷ്യരെ അയയ്ക്കുന്ന ഗഗന്യാന് പദ്ധതിയുടെ പരീക്ഷണങ്ങള് തുടങ്ങും. ഗഗന്യാനിലെ സഞ്ചാരികളുടെ എസ്കേപ്പ് സിസ്റ്റം ടെസ്റ്റ് വെഹിക്കിള് ഉപയോഗിച്ച് പരീക്ഷിക്കുന്നതാണ് പ്രാരംഭ ഘട്ടങ്ങള്. പറന്നുപോകുമ്പോഴും ശബ്ദ വേഗം മറികടക്കുമ്പോഴും എന്തൊക്കെ സംഭവിക്കുമെന്നും അതുമറികടക്കാനുള്ള കാര്യങ്ങളുമാകും ആദ്യ ഘട്ടം പരീക്ഷിക്കുക. ഒക്ടോബറിലാണ് പരീക്ഷണം നിശ്ചയിച്ചിരിക്കുന്നതെന്നും ഉണ്ണികൃഷ്ണന് നായര് വ്യക്തമാക്കി.
അതേസമയം, ചന്ദ്രോപരിതലത്തില്നിന്നും 25 കിലോമീറ്റര് ഉയരത്തില് സെക്കന്ഡില് 1683 മീറ്റര് വേഗത്തില് സഞ്ചരിക്കുകയായിരുന്ന വിക്രം ലാന്ഡറിനെ വേഗം കുറച്ചു താഴേയ്ക്കു ഗതിമാറ്റി ചന്ദ്രന്റെ ഉപരിതലത്തില് ഇറക്കുന്നതായിരുന്നു ചന്ദ്രയാന് ദൗത്യത്തിലെ ഏറ്റവും സങ്കീര്ണമായ കാര്യമെന്നും അദ്ദേഹം ചൂണ്ടിക്കാട്ടി. ചന്ദ്രയാന് 3 വിക്ഷേണവാഹനം LVM3, ലാന്ഡറിലെ സങ്കീര്ണമായ രണ്ടു ഉപകരണങ്ങള് എന്നിവ രൂപകല്പ്പന ചെയ്തത് വിഎസ്എസ്സിയാണ്. ചന്ദ്രന്റെ കുറഞ്ഞ ഗുരുത്വബലവും അന്തരീക്ഷം ഇല്ലാത്തതും ലാന്ഡിങ്ങിനെ ബാധിക്കും. ചന്ദ്രന്റെ ഗുരുത്വബലത്തിന് വിപരീതമായ ഊര്ജം ലഭിക്കാന് ത്രസ്റ്ററുകളെ ജ്വലിപ്പിച്ചു ഘട്ടംഘട്ടമായാണു ചന്ദ്രനിലേക്കു ലാന്ഡറുകള് ഇറക്കുന്നത്. ലാന്ഡര് ചന്ദ്രനിലേക്കു ഇറക്കാനുള്ള റഷ്യയുടെയും അമേരിക്കയുടെയും പല ദൗത്യങ്ങള് പരാജയപ്പെട്ടിരുന്നു. ചന്ദ്രയാന് 2 ന്റെ പരാജയത്തില്നിന്നു പാഠങ്ങള് ഉള്ക്കൊണ്ടു പിഴവുകള് തിരുത്തിയാണ് ഇത്തവണത്തെ വിക്ഷേപണവുമായി ഐഎസ്ആര്ഒ മുന്നോട്ടുപോയതെന്നും വിഎസ്എസ്സി ഡയറക്ടര് പറഞ്ഞു.
Discussion about this post