ബുഡാപെസ്റ്റ് : ലോക അത്‌ലറ്റിക്‌സ് ചാംപ്യന്‍ഷിപ്പ് ജാവലിന്‍ ത്രോയില്‍ നീരജ് ചോപ്രയുള്‍പ്പെടെ മൂന്ന് ഇന്ത്യന്‍ താരങ്ങള്‍ ഫൈനലില്‍. കിഷോര്‍ കുമാര്‍ ജെന, ഡി.പി.മനു എന്നിവരും ഫൈനലിനു യോഗ്യത നേടിയവരില്‍ ഉള്‍പ്പെടുന്നു.
യോഗ്യതാ റൗണ്ടിലെ ആദ്യ ശ്രമത്തില്‍ തന്നെ നീരജ് ചോപ്ര ഫൈനല്‍ ഉറപ്പിക്കുകയായിരുന്നു. 88.77 മീറ്റര്‍ ദൂരമാണ് ആദ്യ ശ്രമത്തില്‍ നീരജ് ചോപ്ര ജാവലിന്‍ എറിഞ്ഞത്. ഈ സീസണിലെ താരത്തിന്റെ മികച്ച പ്രകടനമാണിത്.
കഴിഞ്ഞവര്‍ഷം യുഎസില്‍ നടന്ന യൂജിന്‍ ലോക ചാംപ്യന്‍ഷിപ്പില്‍ നീരജ് വെള്ളി നേടിയിരുന്നു. 88.13 മീറ്റര്‍ ദൂരത്തിലാണ് അന്ന് ജാവലിന്‍ എറിഞ്ഞത്. യോഗ്യതാ റൗണ്ടിലെ തകര്‍പ്പന്‍ പ്രകടനത്തിലൂടെ പാരിസ് ഒളിംപിക്‌സിനും നീരജ് യോഗ്യത നേടി. ഞായറാഴ്ചയാണ് ലോക ചാംപ്യന്‍ഷിപ്പിന്റെ ഫൈനല്‍ മല്‍സരങ്ങള്‍.
ടോക്യോ ഒളിമ്പിക്‌സില്‍ സ്വര്‍ണംനേടി കഴിഞ്ഞ ലോകചാമ്പ്യന്‍ഷിപ്പിനുശേഷം പരിക്കുകാരണം മത്സരരംഗത്തുനിന്ന് വിട്ടുനിന്ന നീരജ് ഇക്കുറി ഡയമണ്ട് ലീഗിലൂടെ തിരിച്ചെത്തിയ ആദ്യ മത്സരത്തില്‍ തന്നെ ഒന്നാമനാവുകയായിരുന്നു.
