മുംബൈ: ജിയോയുടെ ഏറ്റവും പുതിയ ഉത്പന്നമായ ജിയോ ഭാരത് 4ജി ഫോൺ ഓണലൈനിൽ വിൽപ്പനക്കെത്തി. ആമസോണിലൂടെയാണ് ഫോൺ വിൽപ്പനക്ക് എത്തിയിരിക്കുന്നത്. ഇപ്പോഴും 2ജി നെറ്റ്വർക്കുകളെ ആശ്രയിക്കുന്നവർക്ക് കുറഞ്ഞ ചിലവിൽ 4ജി സേവനം ലഭ്യമാക്കുകയാണ് ജിയോ ഭാരത് 4ജി ഫോണിന്റെ ലക്ഷ്യമെന്ന് റിലയൻസ് ജിയോ അറിയിച്ചു. 999 രൂപയാണ് ഫോണിന്റെ വില.
1.77 ഇഞ്ച് ടിഎഫ്ടി ഡിസ്പ്ലേ, എൽ ഇ ഡി ഫ്ലാഷോട് കൂടിയ 0.3 മെഗാ പിക്സൽ ക്യാമറ, 1000 mAh ബാറ്ററി എന്നിവയാണ് ഈ ഫീച്ചർ ഫോണിനുള്ളത്. ആഷ് ബ്ലാക്ക് നിറത്തിൽ വരുന്ന ഫോൺ 128 ജിബി എക്സ്റ്റേണൽ മൈക്രോ എസ്ഡി കാർഡ് സ്റ്റോറേജ് സപ്പോർട്ട് ചെയ്യും. രാജ്യത്തെ വിവിധ പ്രദേശങ്ങളിലെ ആളുകളുടെ സൗകര്യത്തിനായി 23 ഭാഷകൾ ഈ ഫോണിൽ സപ്പോർട്ട് ചെയ്യും.
കാർബണിന്റെ സഹകരണത്തോടെ നിർമ്മിച്ച ഫോണിൽ ‘ഭാരത്‘, ‘കാർബൺ‘ എന്നീ ബ്രാൻഡിംഗുകളും ഉണ്ട്. 4ജി ഇന്റർനെറ്റ് കണക്ടിവിറ്റി വാഗ്ദാനം ചെയ്യുന്ന ഒരു ബേസിക് ഫീച്ചർ ഫോണാണ് ജിയോ ഭാരത് 4ജി. പരിധിയില്ലാത്ത വോയിസ് കോളുകൾ, 14 ജിബി ഡാറ്റ, ജിയോ ആപ്പ് ആക്സസ് എന്നിവ വാഗ്ദാനം ചെയ്യുന്ന 123 രൂപയുടെ അടിസ്ഥാന പ്ലാൻ ഈ ഫോണിന്റെ ഉപഭോക്താക്കൾക്കായി മാത്രം ജിയോ പ്രത്യേകം അവതരിപ്പിച്ചിട്ടുണ്ട്. പരിധിയില്ലാത്ത കോളുകളും 168 ജിബി ഡാറ്റയും വാഗ്ദാനം ചെയ്യുന്ന 1234 രൂപയുടെ പ്രതിവർഷ പ്ലാനും ഈ ഫോൺ ഉപയോഗിക്കുന്നവർക്ക് ലഭ്യമാകും.
നിലവിൽ ആമസോണിലും റിലയൻസ് ഡിജിറ്റൽ സ്റ്റോറുകളിലും മാത്രമാണ് ജിയോ ഭാരത് 4ജി ഫോണുകൾ വിൽപ്പനക്കെത്തിയിരിക്കുന്നത്. വൈകാതെ മറ്റ് പ്ലാറ്റ്ഫോമുകളിലും റീട്ടെയിൽ ഔട്ട്ലെറ്റുകളിലും ഫോൺ വിൽപ്പനക്കെത്തും എന്നാണ് ലഭ്യമാകുന്ന വിവരം.
Discussion about this post