ന്യൂഡൽഹി: ഉപഭോക്താക്കൾക്ക് ഉത്സവ സമ്മാനമായി ഗാർഹിക പാചക വാതക സിലിണ്ടറുകൾക്ക് വൻ വിലക്കുറവ് പ്രഖ്യാപിച്ച് കേന്ദ്ര സർക്കാർ. ഗാർഹിക ആവശ്യങ്ങൾക്ക് ഉപയോഗിക്കുന്ന 14 കിലോഗ്രാം സിലിണ്ടറുകൾക്ക് 200 രൂപയാണ് വില കുറച്ചിരിക്കുന്നത്. ഓണം, രക്ഷാബന്ധൻ, നവരാത്രി തുടങ്ങിയ ആഘോഷങ്ങളുടെ പശ്ചാത്തലത്തിലാണ് വിലക്കുറവ് എന്നാണ് റിപ്പോർട്ട്.
നിലവിൽ സിലിണ്ടർ ഒന്നിന് ഡൽഹിയിൽ 1053 രൂപയും മുംബൈയിൽ 1052.50 രൂപയും ചെന്നൈയിൽ 1068.50 രൂപയും കൊൽക്കത്തയിൽ 1079 രൂപയുമാണ് വില. വിലക്കുറവ് നിലവിൽ വരുന്നതോടെ ഇതിൽ ആനുപാതികമായ മാറ്റമുണ്ടാകും. ഉജ്ജ്വല പദ്ധതിയിൽ അംഗങ്ങളായവർക്കാണ് സബ്സിഡിയിലൂടെ കേന്ദ്ര സർക്കാർ വിലക്കുറവ് നൽകാൻ തീരുമാനിച്ചിരിക്കുന്നത്. എണ്ണ കമ്പനികൾക്കും കേന്ദ്ര സർക്കാർ സബ്സിഡി നൽകും.
ഗാർഹിക പാചക വാതകത്തിന് തത്കാലം വില ഉയർത്തേണ്ട എന്ന നിലപാടാണ് എണ്ണ കമ്പനികൾക്കും ഉള്ളത് എന്നാണ് വിവരം. വാണിജ്യ സിലിണ്ടറുകൾക്ക് ഓഗസ്റ്റ് ആദ്യം 99 രൂപ വില കുറച്ചിരുന്നു. ഇതോടെ ഡൽഹിയിൽ വാണിജ്യ പാചക വാതക സിലിണ്ടറുകൾക്ക് 1,680 രൂപയായിരുന്നു വില.
Discussion about this post