ആംസ്റ്റർഡാം : വിമാനത്തിൽ പുതുതായി അഡൾട്ട് ഒൺലി സെക്ഷൻ ലോഞ്ച് ചെയ്യാനൊരുങ്ങി കൊറണ്ടൻ എയർലൈൻസ്. ടർക്കിഷ്-ഡച്ച് ലെഷർ കാരിയർ എയർലൈനാണ് ഇത്തരമൊരു തീരുമാനവുമായി രംഗത്തെത്തിയത്. പേരു പോലെ തന്നെ ഇവിടെ യുവാക്കൾ/യുവതികൾ മാത്രമേ ഉണ്ടാകൂ. വിമാനത്തിൽ ഇത്തരമൊരു ഏരിയ എന്തിനാണ് എന്ന ചോദ്യം ഇപ്പോൾ തന്നെ പലരുടെയും മനസിൽ ഉദിച്ചുകാണും.
വിമാനത്തിൽ യാത്ര ചെയ്യുമ്പോൾ നാം നേരിടുന്ന വലിയൊരു പ്രശ്നമാണ് കുട്ടികളുടെ കരച്ചിൽ. ചെറിയ പ്രായത്തിലുളള കുട്ടികൾ വിമാനത്തിൽ കയറുമ്പോൾ കരയുന്നത് പതിവാണ്. ആദ്യമായി വിമാനത്തിൽ യാത്ര ചെയ്യുന്നതിന്റെ ബുദ്ധിമുട്ടും മണിക്കൂറുകളോളം എങ്ങോട്ടും പോകാനാകാതെ സീറ്റിൽ തന്നെ ഇരിക്കുന്നതിന്റെ വൈഷമ്യവുമെല്ലാം അവർക്കുണ്ടാകും. ഇതുകൊണ്ടെല്ലാമാണ് കുട്ടികൾ കരയുന്നത്. പല മാതാപിതാക്കൾക്കും ഇത് നിയന്ത്രിക്കാനുമാകില്ല. ഇത് മറ്റ് യാത്രക്കാരെയും രക്ഷിതാക്കളെയും ബുദ്ധിമുട്ടിലാക്കും.
ഇതിന് പരിഹാരം കണ്ടെത്തിക്കൊണ്ടാണ് ഈ എയർലൈൻസ് അഡൾട്ട് ഒൺലി സോൺ ലോഞ്ച് ചെയ്യുന്നത്. കുട്ടികൾ ഇല്ലാതെ യാത്ര ചെയ്യുന്നവർക്ക് വേണ്ടിയാണ് ഇത് പുറത്തിറക്കുന്നത്. 16 വയസിന് മുകളിൽ പ്രായമുള്ളവർക്ക് ഈ സോണിൽ യാത്ര ചെയ്യാവുന്നതാണ്.
ഈ സ്കീമിന് കീഴിൽ,എയർബസ് A350-ൽ ചില സീറ്റുകൾ റിസർവ് ചെയ്യപ്പെടും. ആംസ്റ്റർഡാമിനും കുറക്കാവോയ്ക്കും ഇടയിലുള്ള വിമാനത്തിൽ നവംബറോട് ഈ സൗകര്യം ആരംഭിക്കും. വിമാനത്തിലെ ഈ മേഖല കുട്ടികളില്ലാതെ യാത്ര ചെയ്യുന്ന യാത്രക്കാർക്കും ശാന്തമായ അന്തരീക്ഷത്തിൽ ജോലി ചെയ്യാൻ ആഗ്രഹിക്കുന്ന ബിസിനസ്സുകാർക്കും വേണ്ടിയുള്ളതാണെന്ന് എയർലൈൻ പത്രക്കുറിപ്പിൽ പറഞ്ഞു. ഇത് മാതാപിതാക്കൾക്കും ഏറെ ഉപകാരപ്രദമാണ്. കുട്ടി കരയുമ്പോൾ സഹയാത്രികരിൽ നിന്ന് ഉണ്ടാകാൻ സാധ്യതയുള്ള പ്രതികരണങ്ങളെക്കുറിച്ച് മാതാപിതാക്കൾക്ക് വേവലാതിപ്പെടേണ്ട ആവശ്യമില്ലെന്ന് എയർലൈൻ വ്യക്തമാക്കി.
Discussion about this post