കോഴിക്കോട്: മന്ത്രിമാരോടൊപ്പം വേദി പങ്കിടുന്നതിനിടയില് നെല് കര്ഷകര്ക്കെതിരേയുള്ള സര്ക്കാരിന്റെ നയത്തിനെതിരെ രൂക്ഷ വിമര്ശനം ഉന്നയിച്ച നടന് ജയസൂര്യക്ക് പിന്തുണയുമായി കോണ്ഗ്രസ് നേതാവ് കെ. മുരളീധരന് എം.പി. ജയസൂര്യ പറഞ്ഞത് കര്ഷകരുടെ വികാരവും അവരുടെ നിലവിലെ അവസ്ഥയുമാണെന്ന് പറഞ്ഞ കെ മുരളീധരന്, പൊട്ടിയത് കൃഷിമന്ത്രിയുടെ സിനിമയാണെന്നും പരിഹസിച്ചു. കൃഷിമന്ത്രി ഇറക്കിയ കൃഷി അല്ലാതെ കര്ഷകര് ആരും തന്നെ കൃഷി ഇറക്കുന്നില്ലെന്ന് പറഞ്ഞ മുരളീധരന്, എന്തുകൊണ്ട് അതേവേദിയില് വെച്ച് ജയസൂര്യയുടെ പരാമര്ശങ്ങള്ക്ക് കൃഷിമന്ത്രി മറുപടി നല്കിയില്ലെന്നും ചോദിച്ചു.
“ഇന്നത്തെ കര്ഷകന്റെ അവസ്ഥയാണ് അദ്ദേഹം സൂചിപ്പിച്ചത്. ഏറ്റവും അധികം പട്ടിണി സമരങ്ങള് ഇത്തവണ നടത്തിയത് കേരളത്തിലെ കര്ഷകരാണ്. അവര് സംഭരിച്ച നെല്ലിനൊന്നും വില കിട്ടിയിട്ടില്ല. വളരെ ദുരിതം നിറഞ്ഞ ഓണമാണ് ഇത്തവണ അവരുടേത്. ഏഴ് ലക്ഷത്തോളം മഞ്ഞകാര്ഡ് ഉടമകള്ക്ക് കൊടുത്ത കിറ്റ്, ഒരുലക്ഷത്തോളം ഇനിയും ബാക്കിയുണ്ട്. സര്ക്കാരിന്റെ ഉത്തരവാദിത്വമില്ലായ്മ ഇതിലൂടെ തന്നെ വളരെ വ്യക്തമാണ്. അതുകൊണ്ടാണ് ഒരു രാഷ്ട്രീയ പാര്ട്ടിയോടും ആഭിമുഖ്യമില്ലാത്ത ജയസൂര്യ, ചില അപ്രിയ സത്യങ്ങള് തുറന്നു പറഞ്ഞത്. ഈ നാട്ടിലെ കര്ഷകന്റെ വികാരമാണ് അത്”, മുരളീധരന് പറഞ്ഞു.
സപ്ലൈകോ സംഭരിച്ച നെല്ലിന്റെ പണം കര്ഷകര്ക്ക് കൊടുത്തുതീര്ക്കാത്തതുമായി ബന്ധപ്പെട്ട് നടന് ജയസൂര്യ കഴിഞ്ഞ ദിവസം നടത്തിയ പരാമര്ശം വിവാദമായിരുന്നു. കളമശ്ശേരിയിലെ പൊതു പരിപാടിയില് നടത്തിയ വിമര്ശനത്തിന് മറുപടിയായി, ‘ജയസൂര്യ നല്ല അഭിനേതാവാണ്. അദ്ദേഹം ജനങ്ങളുടെ മുമ്പാകെയല്ല അഭിനയം കാഴ്ചവെക്കേണ്ടത്’, എന്നായിരുന്നു കൃഷിമന്ത്രിയുടെ പ്രതികരണം. ഇതിനെതിരയാണ് ജയസൂര്യയ്ക്ക് പിന്തുണയുമായി കെ മുരളീധരന് എത്തിയത്.
Discussion about this post