മടിയൻ മലചുമക്കുമെന്ന് കേട്ടിട്ടില്ലേ മടിയെന്ന് വച്ചാൽ എന്താണ്? രാവിലെ എഴുന്നേൽക്കാൻ മടി,കുളിക്കാൻ മടി, എന്തിന് ഭക്ഷണം കഴിക്കാൻ വരെ മടി. പലർക്കും മടികൾ പലതാണ്. പ്രായത്തിനും ജീവിതസാഹചര്യത്തിനും അനുസരിച്ച് മടികളുടെ എണ്ണവും ഭീകരതയും ഏറിയും കുറഞ്ഞുമിരിക്കും. ഇന്ന് നന്നാവാം നാളെ നന്നാവാം എന്ന് കരുതിയിരിക്കുക അല്ലാതെ നന്നാവാൻ ഒരു ഉദ്ദേശ്യവും ഉണ്ടാവില്ല. ജീവിതവിജയത്തിലേക്കുള്ള വിലങ്ങുതടിയാണ് ഈ മടിയെന്ന് ആദ്യം ഓർത്തോളൂ. മടിയൊക്കെ മാറ്റി സൂപ്പറാവാൻ ആഗ്രഹിക്കുന്നവരാണ് നിങ്ങളെങ്കിൽ ഈ ടിപ്പുകൾ ഒന്ന് പരീക്ഷിച്ചു നോക്കൂ.
മടിയനും അലസനുമായി മാറുന്നതിന് കാരണങ്ങൾ പലതുണ്ട്. എളുപ്പവും സുഖകരവുമായ അവസ്ഥയിൽ കഴിയാനാണ് മനസ്സ് കൊതിക്കുക. സ്വന്തമായി സൃഷ്ടിച്ച സുരക്ഷിത വലയത്തിനുള്ളിൽ (കംഫർട്ട് സോൺ) ഒതുങ്ങിനിൽക്കാൻ ഇഷ്ടപ്പെടുന്നതാണ് മടിയുടെ അടിസ്ഥാന കാരണം. ഈ സുരക്ഷിത കേന്ദ്രത്തിനുള്ളിൽ ചുരുങ്ങിക്കൂടി ഇതാണ് യഥാർഥ സന്തോഷമെന്ന് ധരിച്ചിരിക്കുകയാണ് പലരും. അവിടെയിരുന്നുകൊണ്ട് അവർ പറയും: എന്താണെന്നറിയില്ല, എനിക്കൊന്നും ചെയ്യാൻ തോന്നുന്നില്ല, ഒന്നിനും ഒരു താൽപര്യവുമില്ല. ഭയങ്കര മടി. ആദ്യം ഇത് മാറ്റുകയാണ് വേണ്ടത്. കംഫർട്ട് സോണുകളിൽ നിന്ന് ഇറങ്ങി നടക്കുക. പ്രതിസന്ധികളെ ഒറ്റയ്ക്ക് നേരിടാൻ മനസിനെയും ശരീരത്തെയും പാകപ്പെടുത്തുക.
ലക്ഷ്യം
മനസിനെ പാകപ്പെടുത്താൻ ആദ്യമായി തന്റെ ജീവിതലക്ഷ്യമേതെന്ന് കണ്ടെത്തുക. അതിലേക്കടുക്കാനായി പ്രയ്തിക്കുക. ലക്ഷ്യം പൂർത്തീകരിക്കാനുള്ള അടങ്ങാത്ത ആഗ്രഹം തന്നെ മനസിനെ മടിയിൽനിന്നും മാറ്റും.
വ്യായാമം
വിജയത്തിലേക്കുള്ള വഴി കല്ലും മുള്ളും നിറഞ്ഞതാണ്. അത് കൊണ്ട് തന്നെ എന്തിനെയും നേരിടാൻ ശീരത്തെ പാകപ്പെടുത്തുക. വ്യായാമം,ധ്യാനം എന്നിവ ശീലമാക്കുക.
പ്ലാനിങ്
എല്ലാ കാര്യങ്ങൾ ചെയ്യുമ്പോഴും കൃത്യമായി ആസൂത്രണം ചെയ്ത് ചെയ്യാൻ ശ്രമിക്കുക. ഏത് കാര്യത്തിനാണോ ഏറ്റവും പ്രാധാന്യമുള്ളത് അല്ലെങ്കിൽ ഏറ്റവും കൂടുതൽ സമയം എടുക്കുന്നത്, ഇത്തരം കാര്യങ്ങൾക്ക് മുൻഗണനകൾ നൽകുക. അതിന് ശേഷം ബാക്കി കാര്യങ്ങളിലേയ്ക്ക് എത്താവുന്നതാണ്.
സോഷ്യൽമീഡിയ
സോഷ്യൽമീഡിയ യുഗത്തിലാണ് നാം ജീവിക്കുന്നത്. അത് കൊണ്ട് അത് മാറ്റിവച്ചുള്ള ജീവിതം നമുക്ക് സാധ്യമല്ല. എന്നാൽ അതിന് പരിധി നിശ്ചിയിക്കുക.
ടൈം മാനേജ്മെന്റ്
സോഷ്യൽമീഡിയ ഉപയോഗം കുറച്ചാൽ തന്നെ നമ്മുടെ കാര്യങ്ങൾ ചെയ്യാൻ നമുക്ക് ഇഷ്ടം പോലെ സമയം കിട്ടും. എന്നാൽ ഒരു കാര്യം ഈ സമയത്തിനുള്ളിൽ ചെയ്ത് തീർക്കും അല്ലെങ്കിൽ നേടും എന്ന് സ്വയം തീരുമാനിക്കുന്നത് കുറച്ചും കൂടെ ആക്ടീവായി പ്രവർത്തിക്കാൻ നിങ്ങളെ സഹായിക്കുന്നതാണ്.
വൃത്തി
പരിസരം ശുചിയായി വയ്ക്കുക കിടക്കുന്ന മുറിയും താമസിക്കുന്ന പരിസരവും വൃത്തിയായി വയ്ക്കുന്നതുവഴി നല്ലൊരു അന്തരീക്ഷം നമുക്ക് ചുറ്റും സൃഷ്ടിക്കും. മടി മാറ്റാനായി ഇത് സഹായകരമാകും. വൃത്തിയാക്കൽ ജോലി സ്വയം ചെയ്യുന്നതാണ് കൂടുതൽ ഫലപ്രദം.
Discussion about this post