മുംബൈ: ഒക്ടോബര്-നവംബര് മാസങ്ങളില് ഇന്ത്യയില് നടക്കുന്ന ഏകദിന ലോകകപ്പിനുള്ള ഇന്ത്യന് ക്രിക്കറ്റ് ടീമിനെ പ്രഖ്യാപിച്ചു. ചൊവ്വാഴ്ച ഉച്ചതിരിഞ്ഞ് അജിത്ത് അഗാര്ക്കര് ക്യാപ്റ്റന് രോഹിത് ശര്മ്മ എന്നിവര് ചേര്ന്ന് ശ്രീലങ്കയില് വച്ച് നടത്തിയ വാര്ത്താ സമ്മേളനത്തിലാണ് ടീമിനെ പ്രഖ്യാപിച്ചത്. മലയാളി താരം സഞ്ജു സാംസണിനെ ടീമിലേക്ക് പരിഗണിച്ചില്ല. സ്പിന്നര്മാരായ ആര്. അശ്വിന്, യുസ്വേന്ദ്ര ചാഹല് എന്നിവരും ടീമിലില്ല.
രോഹിത് ശര്മ നയിക്കുന്ന ടീമില് ഹാര്ദിക് പാണ്ഡ്യയാണ് വൈസ് ക്യാപ്റ്റന്. നേരത്തേ ശ്രീലങ്കയിലെത്തിയ അഗാര്ക്കര് ടീം തിരഞ്ഞെടുപ്പ് സംബന്ധിച്ച് ടീം മാനേജ്മെന്റുമായി ചര്ച്ച നടത്തിയിരുന്നു. കെ.എല് രാഹുലും ഇഷാന് കിഷനും വിക്കറ്റ് കീപ്പര്മാരായി ടീമിലുണ്ട്.
പരിക്ക് കാരണം ദേശീയ ക്രിക്കറ്റ് അക്കാദമിയിലുള്ള രാഹുലിന് മെഡിക്കല് ക്ലിയറന്സ് ലഭിച്ചതിനു പിന്നാലെയാണ് ടീം പ്രഖ്യാപനം. ഏഷ്യാ കപ്പ് ടീമിനൊപ്പമുള്ള തിലക് വര്മയ്ക്കും പ്രസിദ്ധ് കൃഷ്ണയ്ക്കും അവസരം ലഭിച്ചില്ല.
ഒക്ടോബര് അഞ്ചിനാണ് ലോകകപ്പ് മത്സരങ്ങള് തുടങ്ങുന്നത്. ഇംഗ്ലണ്ടും ന്യൂസീലന്ഡും തമ്മിലാണ് ആദ്യ പോരാട്ടം. ഒക്ടോബര് എട്ടിന് ഓസ്ട്രേലിയയ്ക്കെതിരെ ഇന്ത്യ ആദ്യ മത്സരം കളിക്കും. 14 നാണ് ഇന്ത്യ പാകിസ്താന് പോരാട്ടം.
ഏകദിന ലോകകപ്പിനുള്ള ഇന്ത്യന് ടീം: രോഹിത് ശര്മ(ക്യാപ്റ്റന്), ഹാര്ദിക് പാണ്ഡ്യ(വൈസ് ക്യാപ്റ്റന്), ശുഭ്മാന് ഗില്, വിരാട് കോലി, ശ്രേയസ് അയ്യര്, കെ.എല് രാഹുല് (വിക്കറ്റ് കീപ്പര്), രവീന്ദ്ര ജഡേജ, ജസ്പ്രീത് ബുംറ, മുഹമ്മദ് ഷമി, മുഹമ്മദ് സിറാജ്, കുല്ദീപ് യാദവ്, ഇഷാന് കിഷന് (വിക്കറ്റ് കീപ്പര്), ഷാര്ദുല് താക്കൂര്, അക്ഷര് പട്ടേല്, സൂര്യകുമാര് യാദവ്.
Discussion about this post