ബംഗളൂരു : കേരളത്തില്‍ നിപ്പ വൈറസ് ബാധ സ്ഥിരീകരിച്ച സാഹചര്യത്തില്‍ കേരള – കര്‍ണാടക അതിര്‍ത്തി ചെക്ക് പോസ്റ്റുകളില്‍ നിരീക്ഷണം ശക്തമാക്കി കര്‍ണാടക സര്‍ക്കാര്‍. ഇതിന്റെ ഭാഗമായി സര്‍വെയ്ലന്‍സ് യൂണിറ്റുകള്‍ സ്ഥാപിക്കാന്‍ സംസ്ഥാന ആരോഗ്യ മന്ത്രാലയത്തിന് നിര്‍ദ്ദേശം നല്‍കി.
കോഴിക്കോട് ജില്ലയിലേക്ക് അത്യാവശ്യമാണെങ്കില്‍ മാത്രം യാത്ര ചെയ്താല്‍ മതിയെന്ന് കര്‍ണാടക സര്‍ക്കാര്‍ അറിയിച്ചു. നിപ്പ ബാധ നിലനില്‍ക്കുന്ന സാഹചര്യത്തില്‍ ചാമരാജ നഗര, മൈസൂര്‍, കുടക്, ദക്ഷിണ കന്നഡ എന്നീ അതിരത്തികളില്‍ പനി നിരീക്ഷണം കടുപ്പിക്കാനും നിര്‍ദ്ദേശമുണ്ട്.
നിപ്പയെക്കുറിച്ച് ജനങ്ങള്‍ക്കിടയില്‍ അവബോധം വളര്‍ത്താന്‍ ബോധവല്‍ക്കരണ പരിപാടികളും നിപ്പ ലക്ഷണങ്ങള്‍ തിരിച്ചറിയാനും ഐസൊലേഷനില്‍ ആക്കാനും പിഎച്ച്സി തലത്തില്‍ വരെ പരിശീലനം നല്‍കാനും ആരോഗ്യ മന്ത്രാലയം തയ്യാറെടുക്കണം. ഇതിനായി എല്ലാ അതിര്‍ത്തി ജില്ലകളിലും റാപ്പിഡ് റെസ്‌പോണ്‍സ് ടീമുകളെയും നിയോഗിച്ചിട്ടുണ്ട്. ഈ ടീമില്‍ ഒരു മൃഗ ഡോക്ടറും ഉള്‍പെടുമെന്നും സര്‍ക്കാര്‍ വ്യക്തമാക്കി.
എല്ലാ ജില്ലാ ആശുപത്രികളിലും ഒരു ഐസിയു സൗകര്യം, ഐസൊലേറ്റ് ചെയ്യുന്നതിനായി 2 കിടക്കകള്‍ തുടങ്ങിയവ തയ്യാറാക്കാനും പി പി ഇ കിറ്റുകള്‍, ഓക്‌സിജന്‍ വിതരണം എന്നിവ അടക്കം വേണ്ട സൗകര്യങ്ങള്‍ മുന്‍കൂട്ടി സജ്ജമാക്കാനും കര്‍ണാടക സര്‍ക്കാര്‍ ആരോഗ്യ വകുപ്പിന് നിര്‍ദ്ദേശം നല്‍കി. നിപ്പ എന്ന് സംശയിക്കുന്ന കേസ് വന്നാല്‍ ഉടന്‍ ജില്ലാ മെഡിക്കല്‍ അധികൃതരെ വിവരമറിയിക്കണമെന്നും ആവശ്യമെങ്കില്‍ സാമ്പിളുകള്‍ ബെംഗളുരു എന്‍ ഐ വിയിലേക്ക് അയക്കണമെന്നും അറിയിച്ചിട്ടുണ്ട്.
