ലണ്ടന്: തുടര്ച്ചയായി ഉണ്ടാകുന്ന നായ ആക്രമണങ്ങളെ തുടര്ന്ന് എക്സ് എല് ബുള്ളി നായകള്ക്ക് നിരോധനം ഏര്പ്പെടുത്തി ബ്രിട്ടന്. ഈ വര്ഷം അവസാനത്തോടെ ഈ ഇനം നായകള്ക്ക് നിരോധനമുണ്ടാകുമെന്ന് പ്രധാനമന്ത്രി ഋഷി സുനക് അറിയിച്ചു. എക്സ് എല് ബുള്ളിയുടെ ആക്രമണത്തെ തുടര്ന്ന് കഴിഞ്ഞ ദിവസം ഒരാള് മരിച്ചിരുന്നു. ഇതിന്റെ പശ്ചാത്തലത്തിലാണ് നിരോധനം. എക്സ് എല് ബുള്ളി വലിയ തരം നായകളുടെ വളര്ത്തലും വില്പ്പനയുമാണ് നിരോധിക്കുന്നത്.
ബര്മിംഗ്ഹാമില് സഹോദരിയോടൊപ്പം കടയിലേക്ക് നടന്നുപോവുകയായിരുന്ന 11 വയസ്സുകാരിക്ക് നേരെ ആക്രമണം ഉണ്ടായി ഒരാഴ്ച്ച തികയുന്നതിന് മുമ്പാണ് പ്രഖ്യാപനം വന്നത്. നിരവധി ആളുകള്ക്കാണ് ദിവസവും എക്സ് എല് നായകളുടെ കടിയേല്ക്കുന്നത്. വളരെ ആക്രമണ പ്രവണതയുള്ള ഇത്തരം നായകള് രാജ്യത്ത് ഭയാനകമായ സാഹചര്യമാണ് സൃഷ്ടക്കുന്നതെന്ന് പ്രധാനമന്ത്രി പറഞ്ഞു. ‘ഇത് നായയെ തെറ്റായി പരിശീലിപ്പിക്കുന്നതിന്റെ പ്രശ്നമല്ല മറിച്ച് ഈ നായകളുടെ ജനിതക സ്വാഭാവമാണ്. അത് മാറ്റാന് കഴിയില്ല’, അദ്ദേഹം അഭിപ്രായപ്പെട്ടു.
കഴിഞ്ഞ വര്ഷം ബ്രിട്ടനില് നടന്ന മാരകമായ നായ ആക്രമണങ്ങളില് പകുതിയിലേറെയും ഈ ഇനത്തില് നിന്നാണ് ഉണ്ടാവുന്നതെന്ന് എക്സ് എല് ബുള്ളി നിരോധിക്കണമെന്ന് വാദിക്കുന്ന കാമ്പെയിന് ഗ്രൂപ്പായ ബുള്ളി വാച്ച് പറയുന്നു. ഏകദേശം 2014-2015 ഓടെയാണ് രാജ്യത്ത് ഈ ഇനത്തിന്റെ എണ്ണം ക്രമാതീതമായി ഉയര്ന്നത്. ഇവ യഥാര്ഥത്തില് അമേരിക്കന് പിറ്റ്ബുള്ളിന്റെയും അമേരിക്കന് സ്റ്റാഫോര്ഡ്ഷെയറിന്റെയും സങ്കലനമാണ്. അതിനാല് തന്നെ ഇവയ്ക്ക് ശൗര്യവും ആക്രമണോത്സുകതയും വളരെ കൂടുതലാണ്.
Discussion about this post