ന്യൂഡൽഹി: വനിതാ സംവരണ ബിൽ രാജീവ് ഗാന്ധിയുടെ സ്വപ്നമായിരുന്നുവെന്ന് സോണിയഗാന്ധി. വനിതാ സംവരണ ബില്ലിന്മേൽ ഇന്ന് ലോക്സഭയിൽ നടന്ന ചർച്ചയ്ക്കിടെയാണ് സോണിയയുടെ പരാമർശം. വനിതാ സംവരണ ബിൽ ഉടൻ നടപ്പാക്കണമെന്നും സോണിയ ആവശ്യപ്പെട്ടു.
” വനിതാ ശാക്തീകരണത്തിന്റെ ഉദാഹരണമായിരുന്നു ഇന്ദിര ഗാന്ധി. രാജീവ് ഗാന്ധിയുടെ കാലത്താണ് ബിൽ നിർദ്ദേശിച്ചത്. അന്ന് രാജ്യസഭയിൽ പാസായില്ല. പിന്നീട് പി.വി.നരസിംഹറാവു പ്രധാനമന്ത്രിയായപ്പോൾ ഈ ബിൽ പാസാക്കാൻ സാധിച്ചു. കോൺഗ്രസിന്റെ ഭരണകാലത്താണ് പഞ്ചായത്ത് തലത്തിൽ 50 ശതമാനം സ്ത്രീകൾ എന്ന രീതി നടപ്പാക്കിയത്. സ്ത്രീ ശാക്തീകരണത്തിന് വേണ്ടി വളരെ അധികം നടപടികൾ സ്വീകരിച്ച പാർട്ടിയാണ് കോൺഗ്രസ്.
എത്രയും വേഗം ബിൽ നടപ്പാക്കാനുള്ള നീക്കം ഇനി സർക്കാരിന്റെ ഭാഗത്ത് നിന്ന് ഉണ്ടാകണം. ഒബിസി വനിതകൾക്കും തുല്യ പ്രാധാന്യം നൽകണം. 2024ലെ തിരഞ്ഞെടുപ്പിൽ തന്നെ ബിൽ നടപ്പാക്കണമെന്നും” സോണിയ ഗാന്ധി പറയുന്നു.
Discussion about this post