റായ്പൂർ: ലോക്സഭാ തിരഞ്ഞെടുപ്പ് അടുത്തിരിക്കേ ജനകീയനാണെന്ന് വരുത്തി തീർക്കാനുള്ള ശ്രമം തുടർന്ന് കോൺഗ്രസ് നേതാവ് രാഹുൽ ഗാന്ധി. തലയിൽ ട്രോളി ബാഗ് ചുമന്നതിന് പിന്നാലെ തീവണ്ടിയിൽ സാധാരണക്കാർക്കൊപ്പം യാത്ര ചെയ്താണ് രാഹുൽ ജനങ്ങളുടെ കണ്ണിൽ പൊടിയിടാൻ ശ്രമിക്കുന്നത്. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
നിലവിൽ ഛത്തീസ്ഗഡിലാണ് അദ്ദേഹം ഉള്ളത്. ബിലാസ്പൂരിൽ നിന്നും റായ്പൂരിലേക്കായിരുന്നു രാഹുലിന്റെ തീവണ്ടിയാത്ര. ഇന്റർസിറ്റി എക്സ്പ്രസിലെ സ്ലീപ്പർ കോച്ചിലായിരുന്നു അദ്ദേഹം കയറിയത്. അദ്ദേഹത്തിനൊപ്പം മുഖ്യമന്ത്രി ഭൂപേഷ് ബാഗലും മറ്റ് മന്ത്രിമാരും ഉണ്ടായിരുന്നു.
വലിയ തിരക്കായിരുന്നു കോച്ചിൽ അനുഭവപ്പെട്ടത്. മാദ്ധ്യമ പ്രവർത്തകർ ഉൾപ്പെടെ നേരത്തെ തന്നെ കോച്ചിൽ സ്ഥാനം പിടിച്ചിരുന്നു. രാഹുലിനും മുഖ്യമന്ത്രിയ്ക്കുമൊപ്പമുള്ള അനുയായികൾ കൂടി അകത്തേക്ക് കടന്നതോടെ കോച്ചിനുള്ളിൽ വലിയ തിരക്ക് അനുഭവപ്പെട്ടു. ഇതോടെ യാത്രികർക്ക് വലിയ ബുദ്ധിമുട്ടാണ് ഉണ്ടായത്.
പൊതുജനങ്ങളുടെ ബുദ്ധിമുട്ട് നേരിട്ട് ചോദിച്ചറിയുന്നതിന് വേണ്ടിയായിരുന്നു രാഹുലിന്റെ തീവണ്ടിയാത്ര. റായ്പൂരിൽ നിന്നും എൽടിടി എക്സ്പ്രസിൽ രാഹുൽ തിരികെ ബിലാസ്പൂരിലേക്കും എത്തി. കഴിഞ്ഞ ദിവസം ചുമട്ടു തൊഴിലാളികളുടെ പ്രശ്നങ്ങൾ മനസ്സിലാക്കാൻ എന്ന പേരിൽ ചക്രമുള്ള ട്രോളി ബാഗ് രാഹുൽ തലയിൽ ചുമന്നത് വലിയ വാർത്ത ആയിരുന്നു. ഇതിന് പിന്നാലെയാണ് ട്രെയിൻ യാത്ര. വീഡിയോ വ്യാപകമായി പ്രചരിച്ചതോടെ വലിയ പരിഹാസമാണ് ഉയരുന്നത്.
#WATCH | Congress MP Rahul Gandhi boards a train to travel from Bilaspur to Raipur in Chhattisgarh. pic.twitter.com/bguK6pCw7j
— ANI (@ANI) September 25, 2023
