ചെന്നൈ: തമിഴ് നടന് പീഡിപ്പിക്കാന് ശ്രമിച്ചെന്ന വ്യാജ വാര്ത്ത നല്കിയ ഓണ്ലൈന് പോര്ട്ടലിനെതിരെ നിത്യ മേനോന്. താന് ആര്ക്കും അഭിമുഖം നല്കിയിട്ടില്ലെന്നും ആരാണ് ഇങ്ങനെയൊരു വിവാദം ഉണ്ടാക്കി വിട്ടതെന്ന് പറഞ്ഞ് തരണമെന്നും ആവശ്യപെട്ടാണ് നടി രംഗത്ത് വന്നത്. തന്റെ ഔദ്യോഗിക എക്സ് അക്കൗണ്ടിലൂടെയാണ് നടി ഇക്കാര്യം വ്യക്തമാക്കിയത്.
“തെറ്റായ വാര്ത്ത! തികച്ചും അസത്യം! ഞാന് ഒരു അഭിമുഖവും നല്കിയിട്ടില്ല. ആര്ക്കെങ്കിലും അറിയാമെങ്കില്, ഈ വിവാദം ആരാണ് ആരംഭിച്ചതെന്ന് എനിക്ക് കാട്ടിത്തരുക. ക്ലിക്കുകള് ലഭിക്കാന് വേണ്ടി ഇത്തരം തെറ്റായ വാര്ത്തകള് ഉണ്ടാക്കിയ ആളുകളെ കണ്ടെത്തേണ്ടതുണ്ട്”, നിത്യ എക്സില് കുറിച്ചു. ഓണ്ലൈന് വാര്ത്തകളുടെ സ്ക്രീന് ഷോട്ടടക്കം ഉപയോഗിച്ചാണ് നിത്യ പ്രതികരിച്ചത്.
“നമ്മളൊക്കെ വളരെ കുറച്ച് കാലത്തേക്ക് മാത്രമാണ് ഈ ലോകത്തുള്ളത്. ആ കാലത്തിനിടയില് പരസ്പരം എത്ര തെറ്റുകളാണ് നമ്മള് ചെയ്യുന്നത്. ഞാനിത് ചൂണ്ടിക്കാണിക്കുന്നത് തെറ്റ് ചെയ്തവര് അതിന്റെ ഉത്തരവാദിത്വം ഏറ്റെടുക്കാനാണ്. എങ്കില് മാത്രമേ ഇത് അവസാനിക്കുള്ളൂ”, മറ്റൊരു പോസ്റ്റില് നിത്യ കുറിച്ചു.
പീഡനത്തെക്കുറിച്ചുള്ള റിപ്പോര്ട്ടുകള് നിരസിച്ച നിത്യ തെറ്റായ വാര്ത്തകള് പ്രചരിപ്പിക്കുന്ന ആളുകള് ഉത്തരവാദിത്തം ഏറ്റെടുത്ത് വാര്ത്തകള് പിന്വലിക്കണമെന്നും ആവശ്യപ്പെട്ടു. അടുത്തിടെ ബസ് ബാസ്ക്സ് എന്ന ഓണ്ലൈന് പോര്ട്ടലാണ് നിത്യയുമായി അഭിമുഖം നടത്തിയതായും സഹനടന് പീഡിപ്പിക്കാന് ശ്രമിച്ചതായും നടി തുറന്ന് പറഞ്ഞെന്ന് വാര്ത്ത നല്കിയത്. ‘തമിഴ് സിനിമാ വ്യവസായത്തില് ഞാന് ഒരുപാട് പ്രശ്നങ്ങള് നേരിട്ടിട്ടുണ്ട്. ഒരു സിനിമയുടെ ചിത്രീകരണത്തിനിടെ ഒരു തമിഴ് നായകന് എന്നെ ഉപദ്രവിച്ചു’, നടി പറഞ്ഞതായി വാര്ത്തകള് നല്കി.
വാര്ത്ത പുറത്ത് വന്നതിന് പിന്നാലെ എല്ലാ മാദ്ധ്യമങ്ങളും ഇത് വാര്ത്തയാക്കുകയായിരുന്നു. സംഭവം വൈറലായതോടെയാണ് താന് അങ്ങനെയൊരു അഭിമുഖം നല്കിയിട്ടില്ലെന്നും ഓണ്ലൈന് മാദ്ധ്യമത്തില് വന്ന വിവരങ്ങള് വ്യജമാണെന്നും കാട്ടി നടി തന്നെ രംഗത്ത് വന്നത്. 2022ല് പുറത്തിറങ്ങിയ തിരുച്ചിത്രമ്പലം എന്ന ചിത്രത്തിലാണ് നിത്യ മേനോന് അവസാനമായി അഭിനയിച്ചത്. സെപ്റ്റംബര് 28 ന് നെറ്റ്ഫ്ളിക്സില് പുറത്തിറങ്ങുന്ന കുമാരി ശ്രീമതി എന്ന പരമ്പര നിത്യയുടേ അടുത്തതായി പുറത്തിറങ്ങുന്നത്.
Discussion about this post