തൃശൂർ: സിപിഎം ഭരിക്കുന്ന സഹകരണ ബാങ്കുകളിലെ കൊള്ളയ്‌ക്കെതിരെ മുൻ എംപി സുരേഷ് ഗോപിയുടെ നേതൃത്വത്തിൽ ബിജെപി സംഘടിപ്പിക്കുന്ന സഹകാരി സംരക്ഷണ പദയാത്ര ഇന്ന്. പരിപാടി ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ ഉദ്ഘാടനം ചെയ്യും. ഉച്ചയ്ക്ക് ഒന്നരയ്ക്ക് വൻ തട്ടിപ്പ് നടന്ന കരുവന്നൂർ സഹകരണ ബാങ്കിന് മുൻപിൽ നിന്നാണ് പദയാത്ര ആരംഭിക്കുന്നത്.
പണം നഷ്ടമായവരെയും, തട്ടിപ്പിന് ഇരയായതിനെ തുടർന്ന് ആത്മഹത്യ ചെയ്തവരുടെ ബന്ധുക്കളെയും ഉൾപ്പെടുത്തിയാണ് പദയാത്ര. തട്ടിപ്പിൽ മനം നൊന്ത് ആത്മത്യ ചെയ്തവരുടെയും പണം കിട്ടാതെ മരിച്ചവരുടെയും ചിത്രങ്ങളിൽ പുഷ്പാർച്ചന നടത്തിയശേഷമാകും പദയാത്ര തുടങ്ങുക. കരുവന്നൂർ ബാങ്കിന് മുൻപിൽ നിന്നും ആരംഭിക്കുന്ന പദയാത്ര തൃശൂർ നഗരത്തിൽ അവസാനിക്കും. സമാപന സമ്മേളനത്തിൽ ബിജെപി നേതാവ് എം.ടി രമേശ് സംസാരിക്കും. ബിജെപി ജില്ലാ അദ്ധ്യക്ഷൻ കെ.കെ അനീഷ് കുമാർ ഉൾപ്പെടെയുള്ള നേതാക്കളും പരിപാടിയിൽ പങ്കെടുക്കും.
കരുവന്നൂരിൽ സിപിഎമ്മിന്റെ നേതൃത്വത്തിൽ നടന്ന കൊള്ളയ്‌ക്കെതിരെ ബിജെപി ശക്തമായ പ്രതിഷേധമാണ് ഉയർത്തുന്നത്. ഇതിന്റെ ഭാഗമായി കഴിഞ്ഞ മാസം 21 മുതൽ 30വരെ എല്ലാ പഞ്ചായത്ത് – നഗരസഭാ കേന്ദ്രങ്ങളിലും ബിജെപി ധർണ്ണ സംഘടിപ്പിച്ചിരുന്നു. തട്ടിപ്പ് സംശയിക്കുന്ന ബാങ്കുകൾക്ക് മുൻപിൽ അദാലത്തുകൾ ഉൾപ്പെടെ ബിജെപിയുടെ നേതൃത്വത്തിൽ നടന്നിരുന്നു.
Discussion about this post