ഫഹദ് ഫാസിൽ–നസ്രിയ വിവാഹ ഫോട്ടോ ഫേസ്ബുക്കിൽ പങ്കുവച്ച് ബാബു ആന്റണിയുടെ മകൻ ആർതർ ആന്റണി. ഫഹദിനും നസ്രിയയ്ക്കുമൊപ്പം നിൽക്കുന്ന ബാബു ആന്റണിയും മകൻ ആർതറുമാണ് ചിത്രത്തിലുള്ളത്. ഒരു വ്യാഴാഴ്ചയുടെ ഓർമ എന്ന് പറഞ്ഞു തുടങ്ങുന്ന ഫോട്ടോയ്ക്ക് ഒപ്പമുള്ള കുറിപ്പിൽ, സംവിധായകൻ ഫാസിലിനെ താൻ ആദ്യമായി കാണുന്നത് അന്നാണെന്നും ആർതർ പറയുന്നു. 1986 ൽ ഫാസിൽ സംവിധാനം ചെയ്ത പൂവിന് പുതിയ പൂന്തെന്നൽ എന്ന ചിത്രത്തിൽ ബാബു ആന്റണി അഭിനയിക്കുമ്പോൾ അന്ന് ഫഹദിന് ആർതറിന്റെ പ്രായമായിരുന്നുവെന്ന് അച്ഛൻ പറഞ്ഞുവെന്നും ആർതർ കുറിച്ചു.
ബാബു ആന്റണിയെപ്പോലെ തന്നെ മാർഷ്യൽ ആർട്സ് താരമാണ് മകൻ ആർതർ ആന്റണിയും. മിക്സഡ് മാർഷ്യൽ ആർട്സിൽ ഫസ്റ്റ് ഡാൻ ബ്ലാക്ക് ബെൽറ്റ് കരസ്ഥമാക്കിയ ആർതർ ഇപ്പോൾ സിനിമകളിൽ അഭിനയിക്കുന്നുണ്ട്. സന്ദീപ് ജെ എല്ലിന്റെ സംവിധാനത്തിൽ ബാബു ആന്റണി, ആര്തര് ബാബു ആന്റണി, ഗുസ്തി താരവും അമേരിക്കന് ചലച്ചിത്രങ്ങളിലെ വില്ലന് കഥാപാത്രങ്ങളിലൂടെ ശ്രദ്ധേയനായ ചാള്സ് ടെയ്ലര് എന്നിവര് കേന്ദ്ര കഥാപാത്രങ്ങളാകുന്ന ‘ദ ഗ്രേറ്റ് എസ്കേപ്പ്’ എന്ന ചിത്രം തമിഴ്, തെലുങ്ക്, കന്നട, ഹിന്ദി, മലയാളം എന്നിങ്ങനെ അഞ്ചു ഭാഷകളിലാണ് റിലീസ് ചെയ്തത്. ഇടുക്കി ഗോൾഡിലും ഒരു ചെറിയ വേഷത്തിൽ ആർതർ സാന്നിധ്യം അറിയിച്ചിരുന്നു.
