ജോജു ജോർജ് ‘പുലി മട’യിൽ; ഇറങ്ങുന്ന തീയതി പ്രഖ്യാപിച്ചു

ജോജു ജോർജും സംവിധായകൻ എ.കെ. സാജനും ആദ്യമായി ഒന്നിക്കുന്ന ഫാമിലി ത്രില്ലർ ‘പുലിമട’യുടെ റിലീസ് തീയതി പ്രഖ്യാപിച്ചു. ഒക്ടോബർ 26 നാണ് ചിത്രം തിയറ്ററുകളിൽ എത്തുക. സിനിമയുടെ പേരിലെ പുതുമ കൊണ്ടു തന്നെ ചിത്രം പ്രഖ്യാപിച്ച സമയം മുതലേ പുലിമട പ്രേക്ഷകർക്കിടയിൽ ആകാംഷ നിറച്ചിരുന്നു. പൊലീസ് കോൺസ്റ്റബിൾ വിൻസന്റ് സ്‌കറിയയുടെ വിവാഹവും തുടർന്ന് നടക്കുന്ന സംഭവങ്ങളും, അത് അയാളുടെ സ്വഭാവത്തിലും ജീവിതത്തിലും വരുത്തുന്ന മാറ്റങ്ങളുമാണ് പുലിമടയുടെ ഇതിവൃത്തം. ഇരട്ട, നായാട്ട്, ജോസഫ് എന്നീ സിനിമകളിലൂടെ ശ്രദ്ധേയമായ പൊലീസ് കഥാപാത്രങ്ങളെ അവതരിപ്പിച്ച് പ്രേക്ഷക – നിരൂപക പ്രശംസകൾ ഏറ്റുവാങ്ങിയ ജോജു ജോർജ് എന്ന നടന്റെ അഭിനയ മികവ് ഒരിക്കൽക്കൂടി കണ്ടാസ്വദിക്കാൻ പോകുന്ന ചിത്രം ആയിരിക്കും പുലിമട.

ചിത്രത്തിന്റെ ഫസ്റ്റ് ലുക്ക് പോസ്റ്ററും ടീസറും ആദ്യ 3 ഗാനങ്ങളും ഇതിനോടകം ശ്രദ്ധ നേടിയിരുന്നു. പെണ്ണിന്റെ സുഗന്ധം (സെന്റ് ഓഫ് എ വുമണ്‍)എന്ന ചിത്രത്തിന്റെ ടാഗ് ലൈന്‍ തന്നെ പുതുമ സമ്മാനിക്കുന്ന ഒന്നാണ്. പാന്‍ ഇന്ത്യന്‍ സിനിമയായി പുറത്തിറങ്ങുന്ന പുലിമടയില്‍ ജോജുവിന്റെ നായികമാരാകുന്നത് ഐശ്വര്യരാജേഷും ലിജോമോളുമാണ്. മലയാളത്തിൽ ഒരുപിടി വ്യത്യസ്ത സിനിമകൾ സമ്മാനിച്ച എഴുത്തുകാരനും സംവിധായകനായ എ.കെ. സാജൻ കഥ, തിരക്കഥ എഡിറ്റിങ് കൂടി ചെയ്യുന്ന ചിത്രമാണ് പുലിമട. ഇങ്ക് ലാബ് സിനിമാസിന്റേയും ലാൻഡ് സിനിമാസിന്റേയും ബാനറുകളിൽ, രാജേഷ് ദാമോദരൻ, സിജോ വടക്കൻ എന്നിവരാണ് പുലിമട നിർമിക്കുന്നത്. പത്തു വർഷത്തെ ഇടവേളയ്ക്ക് ശേഷം പ്രശസ്ത ഛായാഗ്രാഹകനും സംവിധായകനുമായ വേണു മറ്റൊരു സംവിധായകനായി ക്യാമറ ചലിപ്പിക്കുന്നു എന്ന പ്രത്യേകത കൂടി ഈ ചിത്രത്തിനുണ്ട്. ഒരു ഷെഡ്യൂളിൽ തന്നെ 60 ദിവസം കൊണ്ട് ചിത്രീകരണം പൂർത്തിയാക്കിയ ബിഗ് ബജറ്റ് ചിത്രമായ പുലിമടയിൽ ബാലചന്ദ്രമേനോൻ, ചെമ്പൻ വിനോദ്, ജോണി ആന്റണി, ജാഫർ ഇടുക്കി, ജിയോ ബേബി,അബു സലിം, സോന നായർ, കൃഷ്ണ പ്രഭ, പൗളി വിത്സൻ, ഷിബില തുടങ്ങിയവർ മറ്റു പ്രധാന കഥാപാത്രങ്ങളെ അവതരിപ്പിക്കുന്നു.

സിനിമയുടെ ടൈറ്റിൽ സൂചിപ്പിക്കുന്നതുപോലെ തന്നെ ശരിക്കും ഒരു പുലിമടയിലേക്ക് തന്നെയാവും ഈ ചിത്രം പ്രേക്ഷകരെ കൂട്ടിക്കൊണ്ടു പോവുക. സംഗീതം ഇഷാൻ ദേവ്, പശ്ചാത്തല സംഗീതം അനിൽ ജോൺസൻ,പ്രൊഡക്‌ഷൻ ഡിസൈനർ-വിനീഷ് ബംഗ്ലാൻ, എസ്‌സിക്യൂട്ടീവ് പ്രൊഡ്യൂസർ വർക്കി ജോർജ്, പ്രൊഡക്ഷൻ കണ്ട്രളർ രാജീവ് പെരുമ്പാവൂർ, ആർട്ട് ഡയറക്ടർ ജിത്തു സെബാസ്റ്റ്യൻ, മേക്കപ്പ് ഷാജി-പുൽപ്പള്ളി, ഷമീർ ശ്യാം, കൊസ്റ്റ്യൂം സുനിൽ റഹ്മാൻ, സ്റ്റെഫി സേവ്യർ, സൗണ്ട് ഡിസൈനിങ്–മിക്സിങ് സിനോയ്‌ ജോസഫ്, ഗാനരചന റഫീക്ക് അഹമ്മദ്, ഡോക്ടർ താര ജയശങ്കർ, ഫാദർ മൈക്കിൾ പനയ്ക്കൽ, ചീഫ് അസോസിയേറ്റ് ഡയാക്ടർ ഹരീഷ് തെക്കേപ്പാട്ട്, ഡിഐ ലിജു പ്രഭാകർ, vfx-പ്രോമിസ്, മാർക്കറ്റിങ് ഒബ്സ്ക്യുറ,സ്റ്റിൽ അനൂപ് ചാക്കോ റിൻസൻ എംബി,ഡിസൈൻ ഓൾഡ്മോങ്ക്സ് വിതരണം ആൻ മെഗാ മീഡിയ എന്നിവരാണ് ഈ ചിത്രത്തിന്റെ അണിയറയിൽ ഉള്ളത്.