ശ്രീനഗർ : ലഡാക്കിലെ മലനിരകളിൽ ഉണ്ടായ ഹിമപാതത്തെ തുടർന്ന് ഒരു സൈനികൻ മരണപ്പെട്ടു. ലഡാക്കിലെ മൗണ്ട് കുനിനടുത്താണ് ഹിമപാതം ഉണ്ടായത്. ഹിമപാതത്തെ തുടർന്ന് മൂന്ന് പേരെ കാണാതായതായും ഇന്ത്യൻ ആർമി അറിയിച്ചു.
ഹൈ ആൾട്ടിറ്റ്യൂഡ് വാർഫെയർ സ്കൂളിലെയും ആർമി അഡ്വഞ്ചർ വിംഗിലെയും 40-ഓളം സൈനികർ ലഡാക്കിലെ മൗണ്ട് കുനിന് സമീപം പരിശീലന അഭ്യാസങ്ങളിൽ ഏർപ്പെട്ടിരുന്ന സമയത്താണ് ഹിമപാതം ഉണ്ടായത്. പർവതാരോഹണ പരിശീലനം നൽകുന്ന ‘ട്രെയിൻ ദി ട്രെയിനർ’ എന്ന് പരിശീലനത്തിന്റെ ഭാഗമായിരുന്നു ഈ സൈനികർ.
നാല് പേരാണ് ഹിമപാതത്തിൽ പെട്ടുപോയത്. ദുരന്തത്തെ തുടർന്ന് നടത്തിയ തിരച്ചിലിൽ ഒരു സൈനികന്റെ മൃതദേഹാവശിഷ്ടങ്ങൾ കണ്ടെത്തിയതായി സൈനിക ഉദ്യോഗസ്ഥർ അറിയിച്ചു. മോശം കാലാവസ്ഥയും കനത്ത മഞ്ഞുവീഴ്ചയും ഈ പ്രദേശത്തെ രക്ഷാപ്രവർത്തനം ദുഷ്കരമാക്കുന്നുണ്ട്. എങ്കിൽപോലും സൈന്യം രക്ഷാപ്രവർത്തനങ്ങൾ തുടർന്നുകൊണ്ടിരിക്കുകയാണ്. ഈ രക്ഷാപ്രവർത്തനങ്ങൾ പൂർത്തിയായ ശേഷം മാത്രമായിരിക്കും മരണപ്പെട്ട സൈനികരുടെ വ്യക്തി വിവരങ്ങൾ പുറത്തു വിടുക.
Discussion about this post