ടിനു പാപ്പച്ചന്റെ സംവിധാനത്തിൽ പുറത്തിറങ്ങിയ ചാവേർ എന്ന സിനിമക്ക് അഭിനന്ദനവുമായി മുൻമന്ത്രിയും ആർ.എസ്.പി നേതാവും നിർമാതാവുമായ ഷിബു ബേബി ജോൺ. വളരെ മികച്ച ചലച്ചിത്രമാണ് ചാവേർ എന്ന് അദ്ദേഹം ഫെയ്സ്ബുക്കിൽ എഴുതി.
ഈ സിനിമ കണ്ട പ്രേക്ഷകരുടെയെല്ലാം മനസ് നിറയ്ക്കാൻ ഈ ചിത്രത്തിന് സാധിച്ചുവെന്നത് അത്ര നിസാര കാര്യമല്ലെന്നും ടിനു പാപ്പച്ചൻ എന്ന സംവിധായകനെക്കുറിച്ചോർത്ത് അഭിമാനിക്കുന്നുവെന്നും അദ്ദേഹം പറയുന്നു. നടനും സംവിധായകനുമായ ജോയ് മാത്യുവിന്റെ തിരക്കഥയിൽ കുഞ്ചാക്കോ ബോബനെ നായകനാക്കി ടിനു പാപ്പച്ചൻ ഒരുക്കിയ ചിത്രമാണ് ചാവേർ. ചിത്രത്തിനെതിരെ ചില ഭാഗങ്ങളിൽനിന്നും വ്യാപകമായ ഡീഗ്രേഡിങ് നടക്കുന്നതിനിടയാണ് ചിത്രത്തെയും അത് ചർച്ച ചെയ്യുന്ന വിഷയത്തെയും അവതരണശൈലിയേയും എല്ലാം അഭിനന്ദിച്ചുകൊണ്ട് മുൻ മന്ത്രി രംഗത്തെത്തിയത്.
” ഈ ചിത്രത്തിലെ കഥാപാത്രങ്ങളെ നമുക്ക് ചുറ്റും കാണാൻ സാധിക്കും. നാം ഭാഗമായ ഈ സമൂഹത്തിലെ രാഷ്ട്രീയ അപചയവും രാഷ്ട്രീയത്തിനുള്ളിലെ ജാതിയതയുമെല്ലാം തുറന്നുകാട്ടാൻ ഈ ചിത്രത്തിന് സാധിച്ചിട്ടുണ്ടെന്നത് അഭിനന്ദനാർഹമാണെന്നും അദ്ദേഹം കുറിച്ചു. എന്നാൽ, ഈ ചിത്രത്തെ തകർക്കാൻ ആദ്യദിനം മുതൽ തന്നെ ബോധപൂർവ്വമായ ശ്രമങ്ങൾ പല കോണുകളിൽ നിന്നും ഉയർന്നുവരുന്നുണ്ട്. കാണുക പോലും ചെയ്യാതെ ഒരു നല്ല സിനിമയ്ക്കെതിരെ ഡിഗ്രേഡിങ് നടത്തുന്നത് ഈ സിനിമ തുറന്നു പിടിക്കുന്ന കണ്ണാടിയിൽ സ്വന്തം വൈകൃതം ദർശിക്കുന്നവരാണ്, ഈ സിനിമ പറയുന്ന വസ്തുതകൾ ജനങ്ങളിലേക്ക് എത്തരുതെന്ന് ആഗ്രഹിക്കുന്നവരാണ്. ആ കുഴിയിൽ നാം വീഴരുത്. ചാവേർ നാമോരോരുത്തരും തിയേറ്ററിൽ തന്നെ പോയി കാണേണ്ട സിനിമയാണ്”. ഷിബു ബേബി ജോൺ പറയുന്നു.
വ്യാജപ്രചരണങ്ങളിൽ വഞ്ചിതരായി മികച്ച സിനിമാനുഭവം നാം നഷ്ടപ്പെടുത്തരുതെന്നു പറയുന്ന ഷിബു മനോഹരമായ ഒരു തീയേറ്റർ അനുഭവം സമ്മാനിച്ചതിന് സംവിധായകനും എഴുത്തുകാരനും അഭിനന്ദനങ്ങൾ നേർന്നുകൊണ്ടുമാണ് കുറിപ്പ് അവസാനിപ്പിക്കുന്നത്. കുഞ്ചാക്കോ ബോബനെക്കൂടാതെ ആന്റണി വർഗീസ്, അർജുൻ അശോകൻ, മനോജ് കെ.യു, സംഗീത, ജോയ് മാത്യു എന്നിവരാണ് ചാവേറിൽ പ്രധാനവേഷങ്ങളിൽ എത്തുന്നത്.
ഷിബു ബോബിജോൺ ആദ്യമായി നിർമിക്കുന്ന ലിജോ ജോസ് പെല്ലിശ്ശേരി-മോഹൻലാൽ ചിത്രം മലൈക്കോട്ടൈ വാലിബൻ റിലീസിനൊരുങ്ങുകയാണ്. 2024 ജനുവരി 25-ന് ചിത്രം തിയേറ്ററുകളിലെത്തും എന്നാണ് ഇപ്പോൾ ലഭ്യമായ വിവരം.
