പൂന്തോട്ടം ഒരുക്കാനും പരിപാലിക്കാനും ഇഷ്ടപ്പെടാത്തവരായി അധികമാരും കാണില്ല. പൂക്കളങ്ങനെ വിരിഞ്ഞ് നിൽക്കുന്നത് കാണുമ്പോൾ മനസും നിറയും. ചെടികൾ പല ഔഷധങ്ങളായും നാം ഉപയോഗിക്കുന്നു. എന്നാൽ ഹൃദയാഘാതത്തിന് വരെ കാരണമാകുന്ന ഒരു ചെടിയുണ്ടത്രേ.ഫോക്സ്ഗ്ലോവ് എന്നറിയപ്പെടുന്ന ചെടിയാണ് ഈ സുന്ദരിയായ അപകടകാരി. ഡിജിറ്റാലിസ് എന്ന ശാസ്ത്രീയ നാമത്തിൽ അറിയപ്പെടുന്ന ഇവ കാഴ്ചയിൽ നമ്മുടെ നാട്ടിൻപുറത്തെ കോളാമ്പി പൂവ് പോലെ തോന്നാം. പിങ്ക് കലർന്ന പർപ്പിൾ നിറത്തിലാണ് കൂടുതലും പൂവ് ഉണ്ടാവുക. ചിലയിടങ്ങളിൽ വെള്ള നിറത്തിലുള്ള പൂവും കണ്ടുവരാറുണ്ട്.
യൂറോപ്പ്, ഏഷ്യ തുടങ്ങിയ ഇടങ്ങളിൽ കാണപ്പെടുന്ന ഈ പൂവ് കഴിഞ്ഞ ഇടയ്ക്ക് കശ്മീരിലും പൂത്തുലഞ്ഞത് വാർത്തയായിരുന്നു. 130 സെന്റീമീറ്റർ വരെ ഉയരം വയ്ക്കുന്ന ഈ ചെടിയുടെ ഒരു കൊമ്പിൽ നിരവധി പൂക്കളുണ്ടാകുമത്രേ. അധികം നീർവാർച്ചയില്ലാത്ത ചോലയുള്ള ഇടങ്ങളാണ് സസ്യത്തിന് അനുകൂലസാഹചര്യമൊരുക്കുന്നത്.
എന്നാൽ ഇത്രയും സവിശേഷമായ ഈ പുഷ്പം ഹൃദയാഘാതത്തിന് വരെ കാരണമാകുന്നു. ഇത് മണക്കുകയോ സ്പർശിക്കുകയോ ചെയ്താൽ തന്നെ അത് ജീവന് ആപത്താണ് എന്ന് പഠനങ്ങൾ ചൂണ്ടിക്കാണിക്കുന്നു. ഹൃദയത്തിൻറെ പ്രവർത്തനത്തെയാണ് ‘ഫോക്സ്ഗ്ലോവ്’ പ്രധാനമായും ബാധിക്കുക. ഇതിലുള്ള ചില ഘടകങ്ങളാണ് ഹൃദയത്തിനെ ബാധിക്കുന്നത്. ഫോക്സ്ഗ്ലോവുകളിൽ കാർഡിയാക് ഗ്ലൈക്കോസൈഡുകൾ എന്ന് വിളിക്കപ്പെടുന്ന അതിശക്തമായ സംയുക്തങ്ങൾ അടങ്ങിയിട്ടുണ്ട്. ഇവയാണ് ഹൃദയത്തെ ബുദ്ധിമുട്ടിക്കുന്നത്. ഇവ കാരണം പതിയെ ഹൃദയമിടിപ്പിലാണ് മാറ്റം വരുന്നത്. തുടർന്ന് ഹൃദയാഘാതം വരെ സംഭവിക്കുന്ന അവസ്ഥയുണ്ടാകുന്നു. ജീവൻ തന്നെയും നഷ്ടപ്പെടാം. എല്ലാവരിലും ഒരേ തീവ്രതയിലാകണമെന്നില്ല പൂവ് പ്രശ്നമുണ്ടാക്കുക. പല അളവിൽ ആരോഗ്യപ്രശ്നങ്ങളുണ്ടാക്കാം. അത് ചിലരിലെല്ലാം ജീവനെടുക്കുന്ന ഘട്ടം വരെയുമെത്താം. ഓക്കാനം, കാഴ്ച മങ്ങൽ, പൾസ് മന്ദഗതിയിലാവുക, ഛർദ്ദി, തലകറക്കം, അമിതമായി മൂത്രം പുറത്തുപോവുക, തളർച്ച, പേശികളിൽ ബലക്കുറവ്, വിറയൽ, ചിന്തകളിൽ അവ്യക്തത എന്നിങ്ങനെ പല പ്രശ്നങ്ങളും കാണാം.
ഫോക്സ്ഗ്ലോവ്’ പൂവിൻറെ സൗന്ദര്യത്തിൽ മതിമറന്ന് അതിൻറെ ഗന്ധമറിയാനും സ്പർശിക്കാനുമെല്ലാം വന്ന് ആശുപത്രി മുറിയിലെത്തിയ ചരിത്രവുമുണ്ട്. അതേസമയം ഈ പൂവിൽ നിന്ന് ഹൃദയത്തിനാവശ്യമായ മരുന്ന് നിർമ്മാണത്തിന് ചില ഘടകങ്ങൾ വേർതിരിച്ചെടുക്കാറുണ്ട്. ഡിജിറ്റലിസ് രോഗികളിൽ മതിയായ രക്തചംക്രമണം പുനഃസ്ഥാപിക്കാൻ സാധാരണയായി ഉപയോഗിക്കുന്നു.ഹൃദയാഘാതം , പ്രത്യേകിച്ച് രക്തപ്രവാഹത്തിന് അല്ലെങ്കിൽ രക്താതിമർദ്ദം മൂലമുണ്ടാകുന്ന ഹൃദയസ്തംഭനം . ഏട്രിയൽ ഫൈബ്രിലേഷൻ അല്ലെങ്കിൽ ഫ്ലട്ടർ ഉള്ള രോഗികളിൽ വെൻട്രിക്കുലാർ സങ്കോചത്തിന്റെ വേഗത കുറയ്ക്കാനും മരുന്ന് ഉപയോഗിക്കുന്നു. അതായത് നേരിട്ട് ഉപയോഗിച്ചാൽ ഹൃദയത്തിന് ഭീഷണിയും സംയുക്തങ്ങൾ വേർതിരിച്ച് ഉപയോഗിച്ചാൽ ഉപകാരിയുമാണീ പുഷ്പം.
