ഭക്ഷണം ഇഷ്ടപ്പെടാത്തവരായി ആരുണ്ടല്ലേ? ഇഷ്ടപ്പെട്ട ആഹാരം കഴിക്കാൻ എത്ര പണം വേണമെങ്കിലും മുടക്കാൻ തയ്യാറുള്ളവരും ഒരു നേരത്തെ അന്നത്തിന് പോലും വക കണ്ടെത്താനാവാൻ കഴിയാത്തവരും ഉണ്ട്. എന്നാൽ പണമുണ്ടായിട്ടും ഉഡായിപ്പ് കാണിച്ച് ഫ്രീ ഫുഡ് ജീവിതചര്യയാക്കിയവർ ഉണ്ട്. എന്നാൽ മൂക്കുമുട്ടെ ഭക്ഷണം കഴിച്ച് വലിയ നാടകം നടത്തി മുങ്ങുന്ന ഒരാളെ കയ്യോടെ പിടികൂടിയിരിക്കുകയാണ് റെസ്റ്റോറന്റുകാർ.
ഇവിടെയല്ല അങ്ങ് സ്പെയിനിലെ ബ്ലാങ്ക മേഖലയിൽ നിന്ന് ലിത്വാനിയൻ സ്വദേശിയെ ആണ് കയ്യോടെ പിടികൂടിയത്. വിലകൂടിയ ഭക്ഷണവും പാനീയങ്ങളും ഓർഡർ ചെയ്ത് കഴിച്ച ശേഷം നെഞ്ചുവേദന അഭിനയിച്ച് കുഴഞ്ഞുവീഴുകയാണ് ഇയാളുടെ പതിവ്. 20 ഓളം റെസ്റ്റോറന്റുകളിലാണ് ഇയാൾ തന്റെ നാടകം ഭംഗിയായി അവതരിപ്പിച്ച് വിജയിച്ചിട്ടുള്ളത്.
റെസ്റ്റോറൻറുകളിൽ കയറി ഇഷ്ടമുള്ളതൊക്കെ കഴിക്കും. ബിൽ പേ ചെയ്യാറാകുമ്പോൾ നെഞ്ചുവേദന അഭിനയിക്കും. ഇതോടെ റെസ്റ്റോറൻറിലുള്ളവരെല്ലാം പേടിച്ച് ഇദ്ദേഹത്തെ ആശുപത്രിയിലാക്കാൻ ശ്രമിക്കും. ഇതിനിടയിൽ എങ്ങനെയെങ്കിലുമൊക്കെ മുങ്ങുകയാണ് ആളുടെ പതിവത്രേ.
കഴിഞ്ഞ മാസം ഒരു ഹോട്ടലിലെത്തിയ 50കാരന് 37 ഡോളറിൻറെ ബില്ല് കൊടുത്തപ്പോഴാണ് കള്ളി വെളിച്ചത്താകുന്നത്. ബില്ല് അടയ്ക്കാതെ മുങ്ങാൻ നോക്കുമ്പോൾ ഹോട്ടൽ ജീവനക്കാർ പിടികൂടുകയായിരുന്നു. തൻറെ റൂമിൽ ചെന്ന് പണമെടുത്തുരാമെന്ന് പറഞ്ഞെങ്കിലും ജീവനക്കാർ പോകാൻ അനുവദിച്ചില്ല. ഈ സമയത്താണ് നെഞ്ചുവേദന അഭിനയിച്ചത്.റെസ്റ്റോറൻറെ ജീവനക്കാർ ഓടിക്കൂടിയപ്പോൾ ആംബുലൻസ് വിളിച്ചുതരാൻ ആവശ്യപ്പെട്ടു. പക്ഷേ അവർ നേരെ പോലീസിൽ വിളിക്കുകയായിരുന്നു.
റെസ്റ്റോറൻറുകൾ കേന്ദ്രീകരിച്ച് ഇങ്ങനെയൊരാൾ തട്ടിപ്പ് നടത്തുന്നുണ്ടെന്ന് മനസിലാക്കിയതോടെ റെസ്റ്റോറൻറുകാരെല്ലാം പരസ്പരം ഇദ്ദേഹത്തിൻറെ ചിത്രം അയച്ചുകൊടുത്തിരുന്നുവത്രേ. സംശയം തോന്നിയതോടെയാണ് ഈ റെസ്റ്റോറൻറുകാർ പോലീസിനെ വിളിച്ചത്.ഇനിയാരെയും കബളിപ്പിക്കാതിരിക്കാൻ മറ്റു ഹോട്ടലുകൾക്ക് തങ്ങൾ മുന്നറിയിപ്പ് നൽകിയിട്ടുണ്ടെന്നും റസ്റ്റോറൻറ് മാനേജർ കൂട്ടിച്ചേർത്തു.
