കണ്ണൂർ :കേരളത്തിലെ ഇടതുപക്ഷത്തെ ഭയപ്പെടുത്തി കീഴ്‌പ്പെടുത്താമെന്ന് കേന്ദ്ര ഏജൻസികൾ കരുതേണ്ടെന്ന് ഇടതുമുന്നണി കൺവീനർ ഇപി ജയരാജൻ. സഹകരണ മേഖലയിലെ ഇ ഡി അന്വേഷണത്തിൽ പ്രതിഷേധിച്ചുകൊണ്ട് കണ്ണൂർ പോസ്റ്റ് ഓഫീസിലേക്ക് ഡി വൈ എഫ് ഐ ജില്ലാ കമ്മിറ്റി നടത്തിയ മാർച്ചിൽ സംസാരിക്കുകയായിരുന്നു അദ്ദേഹം.
ആരെങ്കിലും ഒരാൾ ചെയ്ത തെറ്റിന് സഹകരണ മേഖലയാകെ അന്വേഷണം നടത്തുന്നത് ശരിയായ നടപടിയല്ല. സഹകരണ മേഖലയിൽ ഉണ്ടായ ക്രമക്കേടുകൾ അവിടെത്തന്നെ പരിഹരിക്കണം. തെറ്റ് ചെയ്തവരെ ഇടതുപക്ഷം ന്യായീകരിക്കില്ല. ഒരാൾ കൊലപാതകം ചെയ്തെന്നു വെച്ച് എല്ലാവരും കൊലപാതകികൾ ആകുമോയെന്നും ജയരാജൻ ചോദിച്ചു.മറ്റുസംസ്ഥാനങ്ങളിലെ രാഷ്ട്രീയ കക്ഷി നേതാക്കളെ കീഴ്പ്പെടുത്തുന്നതുപോലെ കേരളത്തിലെ ഇടതുപക്ഷത്തെ ഭയപ്പെടുത്താമെന്ന് ആരും വ്യാമോഹിക്കേണ്ടെന്നും ജയരാജൻ പറഞ്ഞു.
മൂന്നാറിലെ കൈയ്യേറ്റം രമ്യമായി പരിഹരിക്കണമെന്നാണ് പാർട്ടിയുടെ തീരുമാനം. ഇടതുമുന്നണിയുടെ നയം മൂന്നാറിൽ നടപ്പാക്കും. പ്രശ്നം പരിഹരിക്കാനാണ് എം എം മണി ഉൾപ്പെടെയുള്ളവർ ശ്രമിക്കുന്നതെന്നും ജയരാജൻ പറഞ്ഞു.ഞങ്ങൾ ഇപ്പോഴും കർഷകർക്കൊപ്പം തന്നെയാണെന്നും ജയരാജൻ പറഞ്ഞു.
