ഗ്രാൻഡ് വിറ്റാരയുടെ സുരക്ഷ വർദ്ധിപ്പിക്കാൻ ഒരുങ്ങി മാരുതി സുസുകി ; ലഭിക്കാൻ പോകുന്നത് ലെവൽ 2 ADAS സുരക്ഷാ സവിശേഷതകൾ

മാരുതി സുസുകിയുടെ ജനപ്രിയ മോഡൽ ആയ ഗ്രാൻഡ് വിറ്റാര കൂടുതൽ സുരക്ഷാ സവിശേഷതകളോടെ പുറത്തിറങ്ങാൻ ഒരുങ്ങുകയാണ്.
അഡ്വാൻസ്ഡ് ഡ്രൈവർ അസിസ്റ്റ് സിസ്റ്റം എന്ന ADAS സാങ്കേതികവിദ്യയാണ് ഗ്രാൻഡ് വിറ്റാരയ്ക്ക് പുതുതായി ലഭിക്കാൻ പോകുന്നത്. ഇതോടെ ADAS സാങ്കേതികവിദ്യയിലുള്ള ആദ്യ മാരുതി സുസുക്കി കാർ ആയി ഗ്രാൻഡ് വിറ്റാര മാറുന്നതാണ്.

വരുന്ന സാമ്പത്തിക വർഷത്തിന്റെ ആദ്യ പാദത്തോടെ ആണ് ADAS സാങ്കേതികവിദ്യ ഉൾപ്പെടുത്തുന്ന ഗ്രാൻഡ് വിറ്റാര പുറത്തിറക്കാൻ കമ്പനി പദ്ധതിയിടുന്നത്. മിഡ്‌സൈസ് എസ്‌യുവികളിലെ സ്മാർട്ട് ഹൈബ്രിഡ്, സ്ട്രോംഗ് ഹൈബ്രിഡ് വേരിയന്റുകളുടെ ടോപ്-എൻഡ് ട്രിമ്മുകളേക്കാൾ 50,000 രൂപ മുതൽ 75,000 രൂപ വരെ വില കൂടുതലായിരിക്കും പുതിയ സുരക്ഷാ ഫീച്ചറുകൾ ഉള്ള ഗ്രാൻഡ് വിറ്റാരയ്ക്ക്. നിലവിൽ ഗ്രാൻഡ് വിറ്റാരയുടെ അടിസ്ഥാന പതിപ്പിന് 10.70 ലക്ഷം രൂപ മുതൽ ടോപ്പ് എൻഡ് ട്രിമ്മിന് 19.20 ലക്ഷം രൂപ വരെയാണ് വില.

ലെവൽ 2 എഡിഎഎസ് സാങ്കേതികവിദ്യ ആയിരിക്കും ഗ്രാൻഡ് വിറ്റാരയിൽ സജ്ജീകരിക്കുക എന്നാണ് നിലവിൽ ലഭിക്കുന്ന സൂചനകൾ. സ്റ്റിയറിംഗ്, ആക്‌സിലറേഷൻ, ബ്രേക്കിംഗ് നിയന്ത്രണങ്ങൾ, തടസ്സം ഒഴിവാക്കൽ എന്നിങ്ങനെയുള്ള സുരക്ഷാ വാഗ്ദാനങ്ങൾ നൽകുന്നു. അപകടങ്ങൾ ഇല്ലാതാക്കുകയോ കുറയ്ക്കുകയോ ചെയ്യുന്നതാണ് ഈ സുരക്ഷാ വാഗ്ദാനങ്ങൾ. ടാറ്റ, ഹ്യുണ്ടായ്, ഹോണ്ട, കിയ തുടങ്ങിയ എതിരാളികൾ ഇതിനകം തന്നെ ലെവൽ 2 ADAS സാങ്കേതികവിദ്യ വാഗ്ദാനം ചെയ്യുന്ന സാഹചര്യത്തിലാണ് മാരുതി സുസുക്കിയുടെ ഈ പുതിയ തന്ത്രപരമായ നീക്കം. ലെവൽ 2 ADAS ഗ്രാൻഡ് വിറ്റാര കൂടി പുറത്തിറങ്ങുന്നതോടെ ഈ വാഹനങ്ങളെല്ലാം തമ്മിൽ കടുത്ത മത്സരം ആയിരിക്കും കാഴ്ചവയ്ക്കുക.