തിരുവനന്തപുരം : പാഠപുസ്തകങ്ങളിൽ നിന്നും ഇന്ത്യ മാറ്റരുതെന്ന് ആവശ്യപ്പെട്ട് കേന്ദ്രസർക്കാരിന് കേരള പൊതുവിദ്യാഭ്യാസ മന്ത്രി വി ശിവൻകുട്ടിയുടെ കത്ത്. ഇന്ത്യ മാറ്റി ഭാരതം എന്നാക്കാനുള്ള തീരുമാനം റദ്ദാക്കണമെന്നാണ് ആവശ്യം. നിലവിലെ സ്ഥിതി നിലനിർത്തുന്നതാണ് വിദ്യാഭ്യാസ സമ്പ്രദായത്തിന്റെയും രാജ്യത്തിന്റെ ഐക്യത്തിന്റെയും താല്പര്യമെന്ന് വി ശിവൻകുട്ടി കത്തിൽ സൂചിപ്പിക്കുന്നു.
പ്രധാനമന്ത്രിക്കും കേന്ദ്ര വിദ്യാഭ്യാസ മന്ത്രിക്കും ഇമെയിൽ വഴിയാണ് വി ശിവൻകുട്ടി കത്തയച്ചത്. ‘ഇന്ത്യ’ എന്ന പേര് രാജ്യത്തിന്റെ സ്വത്വമായ ചരിത്രത്തിന്‍റേയും സംസ്‌കാരത്തിന്‍റേയും വൈവിധ്യത്തിന്‍റേയും സവിശേഷമായ സങ്കലനമാണെന്ന് ശിവൻകുട്ടി കത്തിൽ വ്യക്തമാക്കുന്നു. തലമുറകളായി ‘ഇന്ത്യ’ എന്ന പേര് ഉപയോഗിച്ചാണ് ചരിത്രത്തിന്‍റേയും പൈതൃകത്തിന്‍റേയും സമ്പന്നമായ ഭൂതകാലം വിദ്യാർഥികൾ പഠിച്ചത്. ഇപ്പോൾ അത് മാറ്റുന്നത് ആശയക്കുഴപ്പത്തിന് ഇടയാക്കുകയും വിദ്യാഭ്യാസ തുടർച്ചയെ തടസപ്പെടുത്തുകയും ചെയ്യുമെന്നും കത്തിൽ സൂചിപ്പിച്ചിട്ടുണ്ട്.
“എൻ‌സി‌ഇ‌ആർ‌ടിയുടെ ഇപ്പോഴത്തെ നിലപാട് ചില പ്രത്യയശാസ്ത്രത്തെ മാത്രം പിന്തുണക്കുന്നതാണെന്ന ആരോപണം ഉയർന്നിട്ടുണ്ട്. ഇത് ചരിത്രത്തെ വളച്ചൊടിക്കുന്നതിനെക്കുറിച്ചും വിദ്യാഭ്യാസ രംഗത്തെ പക്ഷപാതത്തെക്കുറിച്ചും ആശങ്ക ഉയർത്തുന്നു. പാഠപുസ്തകങ്ങളിൽ ‘ഇന്ത്യ’ എന്നതിന് പകരം ‘ഭാരത്’ എന്നാക്കാനുള്ള എൻസിഇആർടി പാനലിന്റെ നിർദ്ദേശത്തിൽ ഇടപെടാനും റദ്ദാക്കാനും നടപടിയെടുക്കണം.” എന്നുമാണ് വി ശിവൻകുട്ടിയുടെ കത്ത് വ്യക്തമാക്കുന്നത്.
Discussion about this post