നൂഡൽഹി: ഡൽഹിയിൽ ഇപ്പോൾ നേരിടുന്ന വായുമലിനീകരണം ഡൽഹി നിവാസികളുടെ ആരോഗ്യത്തെ സാരമായി ബാധിക്കുമെന്ന് ആരോഗ്യ വിദഗ്ധർ നേരത്തെ തന്നെ മുന്നറിയിപ്പ് തന്നിട്ടുണ്ട്. വിഷവായുവിൽ നിന്ന് പരാമാവധി മാറി നിൽക്കാനുള്ള നടപടികൾ ജനങ്ങൾ തന്നെ സ്വീകരിക്കണമെന്ന് വിദഗ്ധർ ആവശ്യപ്പെട്ടിട്ടുണ്ട്. നഗരത്തിലെ വായു മലിനീകരണം ക്യാൻസറിന് കാരണമാകുമെന്നതിന് മതിയായ തെളിവുകളുണ്ടെന്ന് ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ (എയിംസ്) ഡോ. പിയൂഷ് രഞ്ജൻ അഭിപ്രായപ്പെടുന്നു.
അന്തരീക്ഷ മലിനീകരണം വളരെ അപകടകരമായ രീതിയിൽ ശ്വസന വ്യവസ്ഥയെബാധിക്കും. വായുമലിനീകരണം ഹൃദയാഘാതം, മസ്തിഷ്കാഘാതം, സന്ധിവാതം പോലുള്ള രോഗങ്ങൾക്കുള്ള പ്രധാന കാരണങ്ങളിലൊന്നാണെന്ന് പഠനങ്ങൾ തെളിയിച്ചിട്ടുണ്ട്. ശ്വാസകോശപരമായ അസുഖങ്ങൾ മാത്രമല്ല, നമ്മുടെ ശരീരത്തിലെ പല അവയവങ്ങളെയും വായു മലിനീകരണം ബാധിക്കും.
‘ഹൃദയാഘാതം, മസ്തിഷ്കാഘാതം, സന്ധിവാതം തുടങ്ങിയ കൊറോണറി ആർട്ടറി രോഗങ്ങളുമായി മലിനീകരണത്തിന് നേരിട്ട് ബന്ധമുണ്ട്. വിവിധ തരത്തിലുള്ള ക്യാൻസറിന് ഇത് കാരണമാകുന്നു എന്നതിന് ശാസ്ത്രീയ തെളിവുകളുണ്ട്,”- എയിംസിലെ മെഡിസിൻ വിഭാഗം അഡീഷണൽ പ്രൊഫസർ ഡോ.രഞ്ജൻ പറയുന്നു.
വായു മലിനീകരണം പല തരത്തിൽ ക്യാൻസറിന് കാരണമാകുന്നായി വിദഗ്ധർ പറയുന്നു. ഇത് ശരീരത്തിലെ ഡിഎൻഎകളെ നശിപ്പിച്ച് ശരീരത്തിൽ കാൻസർ കോശങ്ങളെ വളർത്തും. വായുമലിനീകരണം ശരീരത്തിൽ വീക്കം ഉണ്ടാക്കുകയും നമ്മുടെ പ്രതിരോധ സംവിധാനത്തെ ദുർബലപ്പെടുത്തി ക്യാൻസർ കോശങ്ങളെ പ്രതിരോധിക്കാനുള്ള ശരീരത്തിന്റെ കഴിവിനെ ഇല്ലാതാക്കുകയും ചെയ്യും. വായു മലിനീകരണം ഗർഭിണികളെയും വളരെ അപകടകരമായി ബാധിക്കും. തലച്ചോറിനെയും ഹൃദയത്തെയുമെല്ലാം വായുമലിനീകരണം സാരമായി ബാധിക്കും. എല്ലാ പ്രായക്കാർക്കും ഇത് മൂലം പ്രശ്നങ്ങളുണ്ടായേക്കാം.
വാഹനങ്ങളിൽ നിന്നും വരുന്ന പുകയാണ് ഡൽഹിയിലെ മലിനീകരണത്തിന്റെ പ്രധാന കാരണം. വായുവിലെ പിഎം 2.5 രക്ത ധമനികളിലും ശ്വാസ കോശങ്ങളിലും വളരെ ആഴത്തിൽ തുളച്ചുകയറുമെന്നും അദ്ദേഹം പറഞ്ഞു.
