അത്യാഡംബര കാർ ബ്രാൻഡ് ലോട്ടസ് നവംബർ 9 മുതൽ ഇന്ത്യയിലും ; ആദ്യമെത്തുക എമിറ സ്‌പോർട്‌സും എലെട്രെ ഇവി എസ്‌യുവിയും

ന്യൂഡൽഹി : പ്രശസ്ത ഇംഗ്ലീഷ് സ്‌പോർട്‌സ് കാർ ബ്രാൻഡായ ലോട്ടസ് 2023 നവംബർ 9-ന് ഇന്ത്യൻ വിപണിയിലേക്ക് എത്തുന്നു . ഇപ്പോൾ ചൈനീസ് ബ്രാൻഡായ ഗീലിയുടെ ഉടമസ്ഥതയിലുള്ള ലോട്ടസ് ന്യൂഡൽഹിയിലെ എക്‌സ്‌ക്ലൂസീവ് മോട്ടോഴ്‌സ് വഴിയായിരിക്കും ഇന്ത്യയിൽ വിൽപ്പന നടത്തുന്നത്. 2024-ന്റെ തുടക്കത്തിൽ ന്യൂഡൽഹിയിൽ ആദ്യ ഔട്ട്‌ലെറ്റ് ആരംഭിക്കുമെന്നും സൂചനയുണ്ട്.

ലോട്ടസ് ഇന്ത്യയിൽ ആദ്യം അവതരിപ്പിക്കുന്ന രണ്ട് മോഡലുകൾ പെട്രോൾ വേരിയൻറ് ആയ എമിറ സ്‌പോർട്‌സ്‌കാറും ഓൾ-ഇലക്‌ട്രിക് എലെട്രെ എസ്‌യുവിയുമാകാനാണ് സാധ്യത. ചടുലതയാർന്ന മികച്ച ഡ്രൈവിംഗ് അനുഭവം നൽകുന്ന ഒരു ഭാരം കുറഞ്ഞ സ്പോർട്സ് കാർ ആയാണ് ലോട്ടസ് എമിറ അറിയപ്പെടുന്നത്. ഇന്ത്യയിലെ ഉപഭോക്താക്കൾക്ക് രണ്ട് പവർട്രെയിനുകളിൽ നിന്ന് തിരഞ്ഞെടുക്കാനാകും – 365 എച്ച്പി, 2.0 ലിറ്റർ നാല് സിലിണ്ടർ എഎംജി എഞ്ചിൻ, 406 എച്ച്പി 3.5 ലിറ്റർ വി6 എന്നിവയായിരിക്കും ലോട്ടസ് എമിറ മോഡലിൽ ഇന്ത്യയിൽ അവതരിപ്പിക്കപ്പെടുക. എമിറയുടെ എക്സ് ഷോറൂം വില രണ്ടരക്കോടി മുതൽ മൂന്നു കോടി വരെ ആയിരിക്കുമെന്നാണ് പ്രതീക്ഷിക്കപ്പെടുന്നത്.

രൂപകല്പന കൊണ്ട് ഏറെ ശ്രദ്ധേയമായ കാറാണ് ലോട്ടസ് എലെട്രെ. 5.1 മീറ്റർ നീളവും 1.6 മീറ്റർ ഉയരവുമുള്ള ഈ എസ്‌യുവി, 0.26 ഡ്രാഗ് കോഫിഫിഷ്യന്റുള്ളതും ഒറ്റ ചാർജിൽ പരമാവധി 600 കിലോമീറ്റർ റേഞ്ച് നേടാൻ സഹായിക്കുന്നതുമാണ്.
മൂന്ന് വ്യത്യസ്ത രൂപങ്ങളാണ് എലെട്രെ വാഗ്ദാനം ചെയ്യുന്നത്. എലെട്രെ (611 എച്ച്പി), എലെട്രെ എസ് (611 എച്ച്പി), എലെട്രെ ആർ (918 എച്ച്പി). ഇവ മൂന്നും ഒരേ 109kWh ബാറ്ററിയാണ് നൽകുന്നത്. അത് 800V സിസ്റ്റത്തിൽ പ്രവർത്തിക്കുന്നു. 350kW യൂണിറ്റിന് ചാർജ് ചെയ്യാം. എലെട്രെയുടെ എക്‌സ്‌ഷോറൂം വില 2.5 കോടി മുതൽ 3.1 കോടി രൂപവരെ ആയിരിക്കുമെന്നാണ് പ്രതീക്ഷിക്കുന്നത്.