കേരളത്തിന്റെ പുതിയ മുഖ്യമന്ത്രിയായി വി.ഡി. സതീശനെ നിശ്ചയിച്ച ഹൈക്കമാൻഡ് തീരുമാനത്തിൽ കടുത്ത അതൃപ്തി രേഖപ്പെടുത്തി എൻഎസ്എസ് ജനറൽ സെക്രട്ടറി ജി. സുകുമാരൻ നായർ. മുഖ്യമന്ത്രിയെ തീരുമാനിക്കുന്ന കാര്യത്തിൽ ജനാധിപത്യപരമായ മര്യാദകൾ പാലിക്കപ്പെട്ടില്ലെന്ന് അദ്ദേഹം കുറ്റപ്പെടുത്തി. യുഡിഎഫിന്റെ വിജയത്തിന് പിന്നിൽ എല്ലാ വിഭാഗം ജനങ്ങളുടെയും പിന്തുണയുണ്ട്. എന്നാൽ മുഖ്യമന്ത്രി സ്ഥാനത്തേക്ക് ഒരാളെ തീരുമാനിച്ചപ്പോൾ പുലർത്തേണ്ടിയിരുന്ന മിതത്വവും സമവായവും ഉണ്ടായില്ലെന്നാണ് എൻഎസ്എസ് നേതൃത്വത്തിന്റെ വിലയിരുത്തൽ.
മുഖ്യമന്ത്രി തിരഞ്ഞെടുപ്പിൽ മുസ്ലിം ലീഗ് കടുത്ത സമ്മർദ്ദം ചെലുത്തിയതായും സുകുമാരൻ നായർ ആരോപിച്ചു. യുഡിഎഫിൽ ലീഗ് പിടിമുറുക്കുന്നതിന്റെ വ്യക്തമായ സൂചനയാണിതെന്നും അദ്ദേഹം പറഞ്ഞു. മുന്നണിയിലെ വലിയ കക്ഷിയായ കോൺഗ്രസ് ഇത്തരം സമ്മർദ്ദങ്ങൾക്ക് വഴങ്ങുന്നത് ദൂരവ്യാപകമായ പ്രത്യാഘാതങ്ങൾ ഉണ്ടാക്കുമെന്നും അദ്ദേഹം മുന്നറിയിപ്പ് നൽകി.
ഇതിനിടെ വി.ഡി. സതീശനായി സംസ്ഥാനത്തിന്റെ വിവിധ ഭാഗങ്ങളിൽ ‘നിയുക്ത മുഖ്യമന്ത്രി’ എന്ന നിലയിൽ ഫ്ലക്സ് ബോർഡുകൾ പ്രത്യക്ഷപ്പെട്ടതും വലിയ ചർച്ചയായിട്ടുണ്ട്. പ്രഖ്യാപനം വന്നതിന് പിന്നാലെ പാർട്ടിക്കുള്ളിൽ രമേശ് ചെന്നിത്തല അടക്കമുള്ള മുതിർന്ന നേതാക്കൾ സീനിയോറിറ്റി പരിഗണിച്ചില്ലെന്ന് പരാതിപ്പെട്ട് അമർഷം രേഖപ്പെടുത്തിക്കഴിഞ്ഞു.
