തിരുവനന്തപുരം : സംസ്ഥാനത്തിന്റെ നവംബർ 21 മുതൽ നടത്താൻ നിശ്ചയിച്ചിരുന്ന സ്വകാര്യ ബസ് സമരം പിൻവലിച്ചതായി ബസ് ഉടമകൾ. അനിശ്ചിതകാല സമരം പ്രഖ്യാപിച്ചിരുന്നതിൽ നിന്നുമാണ് പിന്മാറിയത്. കൊച്ചിയില്‍ വെച്ച് ഗതാഗത മന്ത്രിയുമായി നടത്തിയ ചർച്ചയ്ക്ക് ശേഷമായിരുന്നു തീരുമാനം. ഇപ്പോഴത്തെ സാഹചര്യത്തിൽ ജനങ്ങളെ കൂടുതല്‍ ബുദ്ധിമുട്ടിക്കേണ്ട എന്ന് കരുതി അനിശ്ചിതകാല സമരത്തില്‍ നിന്നും പിന്മാറുകയാണെന്ന് ചർച്ചയ്ക്ക് ശേഷം ബസ്സ് ഉടമകൾ അറിയിച്ചു.
149 ബസുകളുടെ പെർമിറ്റ് റദ്ദാക്കിയ തീരുമാനം പുനരാലോചിക്കാമെന്ന ഗതാഗത മന്ത്രിയുടെ ഉറപ്പ് ലഭിച്ചതായി ബസ് ഉടമകൾ അറിയിച്ചു. എന്നാൽ സീറ്റ് ബെൽറ്റും ക്യാമറയും വേണമെന്ന തീരുമാനത്തിൽ മാറ്റമില്ലെന്ന് ഗതാഗത മന്ത്രി വ്യക്തമാക്കി. വിദ്യാര്‍ഥികളുടെ കണ്‍സെഷന്‍ വിഷയത്തില്‍ ചർച്ചയിൽ തീരുമാനമായില്ല.
നവംബര്‍ മുതല്‍ ഫിറ്റ്‌നസ് ടെസ്റ്റിന് സീറ്റ് ബെല്‍റ്റ് നിര്‍ബന്ധമാണെന്ന് ഗതാഗത മന്ത്രി വ്യക്തമാക്കി. 140 കി.മീ വരെയുള്ള പെർമിറ്റുകൾ നി‌ല നിർത്തണമെന്ന ബസ് ഉടമകളുടെ ആവശ്യം മന്ത്രി അംഗീകരിച്ചു. ഇതോടെയാണ് ബസ്സുടമകൾ സമരത്തിൽ നിന്നും പിന്മാറിയതായി വ്യക്തമാക്കിയത്.
