ന്യൂയോര്‍ക്ക് : അഫ്ഗാന്‍ അഭയാര്‍ഥികളെ കൂട്ടത്തോടെ പാകിസ്താനില്‍ നിന്ന് പുറത്താക്കുന്നതില്‍ ദുഃഖം പ്രകടിപ്പിച്ച് അമേരിക്കന്‍ നടി ആഞ്ജലീന ജോളി . അഫ്ഗാന്‍ കുടുംബങ്ങളെ തിരിച്ചയക്കാനുള്ള പാകിസ്താന്റെ അപ്രതീക്ഷിത തീരുമാനത്തിനെതിരെ അവര്‍ ശക്തമായ വിമര്‍ശനം ഉന്നയിച്ചു. ഇന്‍സ്റ്റാഗ്രാം പോസ്റ്റിലുടെയാണ് ആഞ്ജലീന ജോളി ദുഃഖം പ്രകടിപ്പിച്ചത്.
നവംബര്‍ ഒന്നിന് ശേഷം 1.73 ദശലക്ഷത്തിലധികം അഫ്ഗാന്‍ അഭയാര്‍ത്ഥികളെ പുറത്താക്കുമെന്ന് പാകിസ്താന്‍ പ്രഖ്യാപിച്ചിരുന്നു. പാകിസ്താനില്‍ നിന്ന് നാടുകടത്തപ്പെടുന്ന അഫ്ഗാനികളെ സഹായിക്കുമെന്ന് താലിബാന്‍ വ്യക്തമാക്കിയിരുന്നു . രേഖകളില്ലാത്ത അഫ്ഗാന്‍ അഭയാര്‍ത്ഥികളെ നാടുകടത്താനുള്ള പാകിസ്താന്റെ തീരുമാനത്തിനെതിരെ അന്താരാഷ്ട്ര സമൂഹത്തില്‍ നിന്ന് ശക്തമായ പ്രതികരണങ്ങളാണ് ഉണ്ടായത്.
”പതിറ്റാണ്ടുകളായി നിരവധി അഫ്ഗാന്‍ അഭയാര്‍ത്ഥി കുടുംബങ്ങള്‍ താമസിക്കുന്ന രാജ്യമാണ് പാകിസ്ഥാന്‍. ഇന്നത്തെ അഫ്ഗാനിസ്ഥാനില്‍ ജിവിക്കുന്നത് അസാധ്യമായ കാര്യമാണ്. അഭയാര്‍ത്ഥികളെ പറഞ്ഞയ്ക്കുന്നതില്‍ എനിക്ക് സങ്കടമുണ്ട്. പലരുടെയും വിദ്യാഭ്യാസം പോലും ആശങ്കയിലാകും , അഫ്ഗാന്‍ ജനതയുടെ കഷ്ടപ്പാടുകളുടെ നീണ്ട ചരിത്രത്തിലെ ഒരു പുതിയ ദുരന്തമാണിത് – നാല്‍പ്പത് വര്‍ഷത്തിലേറെയായി യുദ്ധവും സംഘര്‍ഷവും കുടിയിറക്കലും അല്ലാതെ മറ്റൊന്നും അവര്‍ അനുഭവിച്ചിട്ടില്ല”, ആഞ്ജലീന ജോളി പറഞ്ഞു.
1970 കളുടെ അവസാനത്തിലും 1980 കളിലും സോവിയറ്റ് അധിനിവേശത്തെത്തുടര്‍ന്ന് പതിനായിരക്കണക്കിന് അഫ്ഗാനികള്‍ പാകിസ്താനിലേക്ക് പലായനം ചെയ്തിരുന്നു. 9/11 സംഭവത്തിനു ശേഷം അഫ്ഗാനിസ്ഥാനെ യുഎസ് ആക്രമിച്ചതിനു പിന്നാലെയാണ് കൂടുതല്‍ പലായനം ഉണ്ടായത്. 2021 ല്‍ താലിബാന്‍ അഫ്ഗാനിസ്താനില്‍ അധികാരമേറ്റതിനു ശേഷം ആറു മുതല്‍ എട്ടു വരെ ലക്ഷം അഫ്ഗാനികള്‍ പാകിസ്താനിലേക്ക് പലായനം ചെയ്തെന്നാണ് കണക്ക്. പാകിസ്താന്‍ സര്‍ക്കാരിന്റെ കണക്കനുസരിച്ച്, ഒക്ടോബര്‍ 31 ന് മുന്‍പ് രാജ്യത്ത് ഏകദേശം 40 ലക്ഷം കുടിയേറ്റക്കാര്‍ ഉണ്ടായിരുന്നു. അവരില്‍ ഏകദേശം 38 ലക്ഷം പേര്‍ അഫ്ഗാനികളാണ്. ഇവരില്‍ 22 ലക്ഷം പേര്‍ക്കു മാത്രമാണ് സര്‍ക്കാര്‍ അംഗീകരിച്ച രേഖ കൈവശമുള്ളത്.
Discussion about this post