വിസ്കോൺസിൻ: കണ്ണിലൊഴിക്കുന്ന തുള്ളിമരുന്നില് വിഷം കലർത്തി സുഹൃത്തിനെ കൊലപ്പെടുത്തിയ കേസിൽ 39കാരിക്ക് ജീവപര്യന്തവും പത്ത് വർഷം അധിക തടവിനും വിധിച്ച് കോടതി. ലിന് ഹെർനാന് എന്ന യുവതിയെ കൊലപ്പെടുത്തിയ കേസിൽ 39കാരിയായ ജെസി കുർസെവിക്സിയാണ് ശിക്ഷിക്കപ്പെട്ടത്. അടുത്ത മാസമായിരിക്കും യുവതിയുടെ ശിക്ഷാവിധി ആരംഭിക്കുക.
2018 ഒക്ടോബർ മാസമാണ് കേസിനാസ്പദമായ സംഭവം. മരുന്നുകള് പൊട്ടിച്ച് കയ്യിൽ പിടിച്ച നിലയിൽ സ്വന്തം വീട്ടിലായിരുന്നു യുവതിയുടെ കുടുംബ സുഹൃത്തായ ലിന് ഹെർനാനിന്റെ മൃതദേഹം കണ്ടെത്തിയത്. സുഹൃത്ത് അബോധാവസ്ഥയിലാണ് ശ്വാസമെടുക്കുന്നില്ലെന്നും അറിയിച്ച് പോലീസിന്റെയും ആംബുലന്സിന്റേയും സഹായം തേടിയത് ജെസി ആയിരുന്നു. പതിവ് സന്ദർശനത്തിന് എത്തിയപ്പോള് സുഹൃത്തിനെ അബോധാവസ്ഥയില് കണ്ടെത്തിയെന്നാണ് ജെസി പോലീസിനോട് പറഞ്ഞത്. ലിന് ആത്മഹത്യ ചെയ്തതാണോയെന്ന് സംശയമുണ്ടെന്നും യുവതി പോലീസിനോട് പറഞ്ഞു. എന്നാൽ, പരിശോധനയിൽ ലിന്നിന്റെ മൃതദേഹത്തില് നിന്ന് ടെട്രാഹൈഡ്രോസോലിന് എന്ന വസ്തു കണ്ടെത്തിയതാണ് കേസിൽ നിർണായകമായത്.
കണ്ണിലൊഴിക്കുന്ന തുള്ളിമരുന്നില് കാണുന്ന പദാർത്ഥമായിരുന്നു ഇത്. അമിതമായ അളവിൽ ഈ വസ്തു അകത്ത് എത്തുന്നത് രക്ത സമ്മർദ്ദം വർധിക്കാനും അപകടകരമായ രീതിയിൽ ശ്വാസം മുട്ടല് അടക്കമുള്ളവ അനുഭവപ്പെടാനും സാധ്യത ഉണ്ടാക്കുന്നതാണ്. പിന്നീടുള്ള ചോദ്യം ചെയ്യലിൽ കണ്ണിലൊഴിക്കുന്ന മരുന്ന് അമിതമായ അളവില് കുടിവെള്ളത്തിൽ കലർത്തി സുഹൃത്തിന് നൽകിയിരുന്നുവെന്ന് ജെസി സമ്മതിച്ചു. 2 കോടിയോളം രൂപ ലിന്നിന്റെ പക്കല് നിന്ന് ജെസി തട്ടിയെടുത്തിരുന്നു. ഇതിനെ ചൊല്ലിയുള്ള തർക്കമാണ് കൊലപാതകത്തിന് പിന്നിലെന്നാണ് അന്വേഷണത്തില് വ്യക്തമായത്.
Discussion about this post