കണ്ണൂർ :കേരളത്തിന് ഗവർണറുടെ ആവശ്യമില്ല. ആ പദവി വേണ്ടെന്ന അഭിപ്രായമാണ് ഞങ്ങളുടെ പാർട്ടിയ്ക്കുള്ളതെന്നും സിപിഎം സംസ്ഥാന സെക്രട്ടറി എം വി ഗോവിന്ദൻ. ഭരണഘടനാപരമായി ആ പദവി നിലനിൽക്കുന്നതിനാൽ ഞങ്ങൾ സഹകരിക്കുന്നു. സിപിഎമ്മിന്റെ അഭിപ്രായത്തിൽ ഗവർണറുടെ ആവശ്യം ഇല്ല എന്നുതന്നെയാണുള്ളത്.കണ്ണൂരിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.
ഇന്ത്യ പോലൊരു ജനാധിപത്യ രാജ്യത്ത് എന്തിനാണ് ഇതുപോലൊരു പദവിയെന്ന് ഗോവിന്ദൻ ചോദിച്ചു. തിരഞ്ഞെടുക്കപ്പെട്ട ഒരു മന്ത്രിസഭയുടെ മേലെ ഒരു സംസ്ഥാനത്തിന് ഗവർണറുടെ ആവശ്യം ഇല്ല. ബ്രിട്ടീഷ് സാമ്രാജ്യത്വത്തിന്റെ പഴയകാല ധാരണയിൽ നിന്നും രൂപപ്പെട്ടുവന്ന ഒരു പദവിയാണിത്. കേരളസർക്കാരിനെതിരെ നിലപാട് സ്വീകരിക്കുന്ന ഗവർണറാണ് ആരിഫ് മുഹമ്മദ് ഖാനെന്നും ഗോവിന്ദൻ പറഞ്ഞു.
നിരവധി സംസ്ഥാനങ്ങളിലെ ഗവർണർമാർ എടുത്തുകൊണ്ടിരിക്കുന്ന നിലപാടുകൾ ഭരണഘടനാ വിരുദ്ധമാണ്. കേന്ദ്രസർക്കാരിന്റെ നിലപാടുകളോട് യോജിക്കാത്തവർക്കെതിരെ നടപടിയെടുക്കുകയാണിപ്പോൾ.അതിന്റെ ഭാഗമായിട്ടാണ് കേരളത്തിലും പഞ്ചാബിലും തമിഴ്‌നാട്ടിലും ബംഗാളിലും നടക്കുന്നതെന്നും അദ്ദേഹം പറഞ്ഞു.
