തിരുവനന്തപുരം: ഇന്ദ്രൻസ് ഇനി നടൻ മാത്രമല്ല വിദ്യാർത്ഥിയും. പത്താംക്ലാസ് തുല്യത ക്ലാസിന് ചേർന്നതോടെയാണ് അദ്ദേഹം പുതിയ റോളിൽ എത്തുന്നത്. നാലാം ക്ലാസ് മാത്രാണ് അഭിനയത്തിൽ ദേശീയ- സംസ്ഥാന അംഗീകാരങ്ങൾ നേടിയിട്ടുള്ള ഇന്ദ്രൻസിന്റെ വിദ്യാഭ്യാസ യോഗ്യത.
തിരുവനന്തപുരം മെഡിക്കൽ കോളേജ് ഹൈസ്കൂളിലാണ് അദ്ദേഹം തുല്യതാ ക്ലാസിന് ചേർന്നിരിക്കുന്നത്. എല്ലാ ഞായറാഴ്ചയുമാണ് ക്ലാസ്.തുല്യത ക്ലാസിന് ചേർന്ന വിവരം താരം തന്നെയാണ് പങ്കുവച്ചത്. 10 മാസമാണ് പഠന കാലയളവ്. നിരവധി അംഗീകാരങ്ങൾ ലഭിച്ചിട്ടും പലയിടങ്ങളിലും പേടിയോടെ പിന്നോട്ട് വലിയുന്നുവെന്നും ഈ സാഹചര്യം ഒഴിവാക്കാനാണ് പഠിക്കാൻ തീരുമാനിച്ചത് എന്നും താരം പറയുന്നു.
സാമ്പത്തികമായി പിന്നോക്കം നിൽക്കുന്ന കുടുംബത്തിലായിരുന്നു ഇന്ദ്രൻസിന്റെ ജനനം. ജീവിത പ്രാരാബ്ദങ്ങളെ തുടർന്ന് അദ്ദേഹം നാലാം ക്ലാസിൽ പഠനം അവസാനിപ്പിക്കുകയായിരുന്നു. തിരുവനന്തപുരം കുമാരപുരം സ്കൂളിലാണ് ഇന്ദ്രൻസ് പഠിച്ചിരുന്നത്. തുടർന്ന് കുടുംബം നോക്കാനായി തയ്യൽ ജോലിയിലേക്ക് കടന്നു. ഇവിടെ നിന്നുമാണ് അദ്ദേഹം സിനിമയിലേക്ക് എത്തിയത്.
പഠനം അവസാനിപ്പിച്ചുവെങ്കിലും അദ്ദേഹം വായനാ ശീലം തുടർന്നു. ഇത് അറിവ് പകർന്നു. വായന ശീലം വലിയ മാറ്റങ്ങളാണ് ജീവിതത്തിൽ ഉണ്ടാക്കിയിട്ടുള്ളതെന്ന് അദ്ദേഹം നിരവധി വേദികളിൽ പറഞ്ഞിട്ടുണ്ട്.
Discussion about this post