തിരുവനന്തപുരം:സാമ്പത്തിക പ്രതിസന്ധിയില്‍ വലയുന്ന സംസ്ഥാനസര്‍ക്കാര്‍ നിത്യ ചെലവുകള്‍ക്കായി പൊതുവിപണയില്‍ നിന്ന് നാളെ 1500 കോടി രൂപ വായ്പയെടുക്കും. കടമെടുക്കാതെ അടുത്ത മാസത്തേ ശമ്പളവും പെന്‍ഷനും കൊടുക്കാനാവാത്ത അവസ്ഥയിലായിരുന്നു സര്‍ക്കാര്‍ .ജനുവരി മുതലുള്ള മൂന്ന് മാസത്തേക്ക് 4000 കോടി കടമെടുക്കാന്‍ കേന്ദ്രത്തോട് അനുമതി ചോദിച്ചിരുന്നു. ഇതില്‍ നിന്ന് 2000 കോടി മുന്‍കൂര്‍ അനുവദിക്കാന്‍ കേരളം അപേക്ഷിച്ചിരുന്നു. കേന്ദ്രം അനുമതി നല്‍കി. ഇതില്‍ 1500 കോടിയാണ് നാളെ പൊതുവിപണിയില്‍ നിന്ന് കടമെടുക്കുന്നത്. ഇതോടെ ജനുവരി, ഫെബ്രുവരി, മാര്‍ച്ച് മാസങ്ങളിലെ ചെലവിനായി കടമെടുക്കാന്‍ അവശേഷിക്കുന്നത് 2500 കോടിയോളം മാത്രമാകും.
ഡിസംവര്‍ വരെ പൊതുവിപണിയില്‍ നിന്ന് 21800 കോടി കടമെടുക്കുന്നതിനായിരുന്നു കേന്ദ്രാനുമതി നല്‍ക്കിയിരുന്നത്.എന്നാല്‍ ഇതില്‍ നിന്ന് കേരളം കഴിഞ്ഞ മാസം കടമെടുത്തിരുന്നു. ഇപ്പോള്‍ അതില്‍ 52 കോടി മാത്രമാണ് അവശേഷിക്കുന്നത്. നവകേരളസദസ് നടക്കുന്ന സമയത്ത് പെന്‍ഷനും ശമ്പളവും ഇല്ലാതായാല്‍ സര്‍ക്കാരിന് അത് വലിയൊരു തിരിച്ചടിയായിരിക്കും. തിരിച്ചടി നേരിടാനാണ് സര്‍ക്കാര്‍ മുന്‍കൂര്‍ വായ്പക്ക് കേന്ദ്രത്തിന്റെ അനുമതി തേടിയത്.
ഡിസംബറിനുശേഷം കേന്ദ്രം കൂടുതല്‍ വായ്പ അനുവദിച്ചില്ലെങ്കില്‍ രൂക്ഷമായ സാമ്പത്തിക പ്രതിസന്ധിയിലേക്ക് കേരളം പോയേക്കുമെന്ന ആശങ്കയിലായിരുന്നു സര്‍ക്കാര്‍. കടമെടുക്കുന്നതിന്റെ ഭൂരിഭാഗവും ശമ്പളത്തിനും പെന്‍ഷനും മറ്റു സ്ഥിരം ചെലവുകള്‍ക്കുമാണ് ഉപയോഗിക്കുന്നത് എന്നാണ് സര്‍ക്കാര്‍ പറയുന്നത്.ഡിസംബറിനുശേഷം കേന്ദ്രം തീരുമാനം പുനഃപരിശോധിക്കുമെന്ന പ്രതീക്ഷയിലാണ് സംസ്ഥാനം. ഫെബ്രുവരി, മാര്‍ച്ച് മാസങ്ങളിലായാണ് പദ്ധതി ചെലവിന്റെ ബില്ലുകള്‍ കൂട്ടത്തോടെ ട്രഷറിയിലേക്ക് എത്തുന്നത്. എന്നാല്‍ വൈദ്യുതി മേഖലയില്‍ നടപ്പിലാക്കിയ പരിഷ്‌കാരങ്ങളുടെ പേരില്‍ 4500 കോടിയെങ്കിലും അധികം വായ്പയെടുക്കുന്നതിന് കേന്ദ്രസര്‍ക്കാര്‍ അനുമതി നല്‍കുമെന്ന പ്രതീക്ഷയിലാണ് ധനവകുപ്പ്. ഇതിനുള്ള ചര്‍ച്ചകള്‍ കേന്ദ്ര സര്‍ക്കാരുമായി നടക്കുന്നുണ്ട്.
Discussion about this post