കൊച്ചി : വീണ്ടും വിവാദ പരാമര്‍ശവുമായി സംവിധായകന്‍ അല്‍ഫോണ്‍സ് പുത്രന്‍. സംസ്ഥാനത്തെ തീയേറ്റര്‍ ഉടമകള്‍ കാരണം ഇവിടെ ഒരുപാട് എഴുത്തുകാരുടെ കണ്ണുനീര്‍ വീണിട്ടുണ്ടെന്നും താനതില്‍ ഒരാളാണെന്നും അല്‍ഫോണ്‍സ് പുത്രന്‍ പറഞ്ഞു. സംവിധായകന്‍ കാര്‍ത്തിക് സുബ്ബുരാജ്, നടന്‍ ബോബി സിന്‍ഹ തുടങ്ങിയവര്‍ക്കൊപ്പം ഇന്‍സ്റ്റാഗ്രാമില്‍ അല്‍ഫോണ്‍സ് പുത്രന്‍ ഒരു ചിത്രം പങ്കുവച്ചിരുന്നു. ഇതിന് താഴെയായി ആളുകള്‍ കമന്റുകളായി ചോദിച്ച ചോദ്യങ്ങള്‍ക്ക് മറുപടി പറയുകയായിരുന്നു അദ്ദേഹം.
നിരവധി ആളുകളാണ് ചോദ്യങ്ങളുമായി എത്തിയത്. ആരോഗ്യത്തെ പറ്റിയും, തീയേറ്റര്‍ കരിയര്‍ അവസാനിപ്പിക്കുകയാണെന്ന അല്‍ഫോണ്‍സിന്റെ പ്രഖ്യാപനത്തേ പറ്റിയൊക്കെ നിരവധി ചോദ്യങ്ങള്‍ പ്രേക്ഷകര്‍ ഉന്നയിച്ചു. ഇനി തിയേറ്റര്‍ സിനിമകള്‍ ചെയ്യില്ലേ എന്ന് ഒരാള്‍ ചോദിച്ചതിന് രൂക്ഷമായ ഭാഷയിലായിരുന്നു സംവിധായകന്റെ പ്രതികരണം. തന്റെ ആരോഗ്യം ക്ഷയിക്കാന്‍ കാരണം തിയേറ്റര്‍ ഉടമകളാണെന്ന് അല്‍ഫോണ്‍സ് പുത്രന്‍ ആരോപിച്ചു.
“തിയേറ്ററില്‍ വേണോ വേണ്ടേ എന്ന് മാത്രം ഞാന്‍ തീരുമാനിച്ചിട്ടില്ല. തിയേറ്റര്‍ ഓപ്പണ്‍ ചെയ്ത് റിവ്യൂ ചെയ്യാന്‍ സഹായം ചെയ്ത് കൊടുത്തത് തിയേറ്റര്‍ ഉടമകള്‍ തന്നെയല്ലേ? അവര്‍ക്കു വേണ്ടി ഞാന്‍ എന്തിനാ കഷ്ടപ്പെടുന്നേ? ഏതെങ്കിലും തിയേറ്ററുകാരന്‍ എന്റെ സിനിമ പ്രമോട്ട് ചെയ്‌തോ? അവര്‍ പറയുന്ന ഡേറ്റ് ആയിരുന്നു ഓണം. അവര്‍ പറയുന്ന ഡേറ്റില്‍ വേണം പടം റിലീസ് ചെയ്യാന്‍. ഒരു എഴുത്തുകാരന്‍ എന്ന് പറയുന്നത് ആയിരം മടങ്ങു വലുതാണ്. സംവിധായകന്‍ എന്ന നിലയിലാണ് നിങ്ങള്‍ എന്നെ മനസ്സിലാക്കുന്നത്.
എല്ലാ സാങ്കേതിക പ്രവര്‍ത്തകര്‍ക്കും ജോലി ചെയ്യാന്‍ ഒരു മുറിയിലിരുന്ന് എഴുത്തുകാരന്‍ എഴുതുന്നതാണ് സിനിമയാകുന്നത്. എങ്കിലേ അത് പ്രദര്‍ശിപ്പിക്കാനുള്ള സിനിമയാകൂ. ഞാനൊഴുക്കിയ കണ്ണീരിന് അര്‍ഹമായ നഷ്ടപരിഹാരം ലഭിക്കണം. അതുപോലെ മറ്റു എഴുത്തുകാരുടെയും. അതിന് ശേഷം അല്‍ഫോണ്‍സ് പുത്രന്‍ ആലോചിക്കും. ചാടിക്കേറി സിനിമ ചെയ്യാന്‍ ഞാന്‍ സൂപ്പര്‍മാനൊന്നുമല്ല. ആ വിഡ്ഢികള്‍ നശിപ്പിച്ച എന്റെ ആരോഗ്യപ്രശനങ്ങള്‍ എനിക്ക് പരിഹരിക്കേണ്ടതുണ്ട്”, അല്‍ഫോണ്‍സ് പുത്രന്‍ പ്രതികരിച്ചു.
കുറച്ചുനാളുകള്‍ക്ക് മുന്‍പാണ് സിനിമാ കരിയര്‍ അവോസാനിപ്പിക്കുന്നുവെന്ന് അല്‍ഫോന്‍സ് പുത്രന്‍ പ്രഖ്യാപിച്ചത്. തനിക്ക് ഓട്ടിസം സ്പെക്ട്രം ഡിസോര്‍ഡര്‍ എന്ന് സ്വയം കണ്ടെത്തിയതായും തന്റെ സിനിമ തീയേറ്റര്‍ കരിയര്‍ അവസാനിപ്പിക്കുകയാണെന്നുമാണ് അല്‍ഫോണ്‍സ് പറഞ്ഞിരുന്നത്.
Discussion about this post