ബാങ്കോക്ക് : രാം ലല്ല പ്രതിഷ്ഠ നടത്തുന്നതിന് മുൻപായി തായ്‌ലൻഡിലെ പുണ്യനദികളിൽ നിന്നുള്ള വെള്ളവും മണ്ണും അയോദ്ധ്യയിൽ എത്തിക്കും. വിശ്വഹിന്ദു പരിഷത്തിന്റെ തായ്‌ലൻഡ് വിഭാഗം പ്രസിഡണ്ടായ സുശീൽ കുമാർ സറഫ് ആണ് ഇക്കാര്യം വ്യക്തമാക്കിയത്. തായ്‌ലൻഡ് സന്ദർശനത്തിനായി എത്തിയ ഗോവിന്ദ് ബ്രിജ് മഹാരാജിന്റെ കയ്യിൽ തായ്‌ലന്റിലെ നദികളിൽ നിന്നുള്ള വെള്ളവും മണ്ണും കൊടുത്തു വിടുമെന്ന് അദ്ദേഹം അറിയിച്ചു.
അടുത്തവർഷം ജനുവരി 22നാണ് അയോദ്ധ്യയിൽ രാം ലല്ല പ്രാൺ പ്രതിഷ്ഠ ചടങ്ങ് നടക്കുന്നത്. രാമക്ഷേത്രത്തിന്റെ പ്രതിഷ്ഠ ചടങ്ങുകൾ ബാങ്കോക്കിൽ തൽസമയം സംരക്ഷണം ചെയ്യുമെന്ന് നേരത്തെ വിശ്വഹിന്ദു പരിഷത്ത് വ്യക്തമാക്കിയിരുന്നു. അയോദ്ധ്യക്ഷേത്രത്തിന്റെ ഒരു ചെറിയ പതിപ്പ് ബാങ്കോക്കിൽ നിർമ്മിച്ചിട്ടുള്ളതായും വിഎച്ച്പി വ്യക്തമാക്കി.
തായ്‌ലന്റിലെ കല, സാഹിത്യം, നൃത്തം, നാടകം, പൗരാണിക വാസ്തുവിദ്യകൾ എന്നിവയിലെല്ലാം ശ്രീരാമന്റെ സാന്നിധ്യം കാണപ്പെടുന്നതാണ്. രാമായണത്തിന്റെ തായ് അവതരണത്തെ രാമകീൻ അല്ലെങ്കിൽ രാമകീർത്തി എന്നാണ് വിളിക്കുന്നത്. പുരാതന ഇന്ത്യയും തായ്‌ലൻഡും പങ്കിട്ട ചരിത്രപരവും സാംസ്‌കാരികവുമായ ബന്ധങ്ങളിൽ വേരൂന്നിയതാണ് തായ്‌ലൻഡും ശ്രീരാമനും തമ്മിലുള്ള ബന്ധം.
Discussion about this post