പുതുച്ചരി:മൈചോങ് ചുഴലിക്കാറ്റ് അടുത്തുവരുന്ന സാഹചര്യത്തില്‍ പുതുച്ചേരിയുടെ തീരപ്രദേശങ്ങളില്‍ നിരോധനാജ്ഞ ഏര്‍പ്പെടുത്തി. പടിഞ്ഞാറന്‍ മധ്യബംഗാള്‍ ഉള്‍ക്കടലിലും, തെക്കന്‍ ആന്ധ്രാപ്രദേശിനും അതിനോട് ചേര്‍ന്നുള്ള വടക്കന്‍ തമിഴ്‌നാട് തീരത്തും ചുഴലിക്കാറ്റ് ആഞ്ഞടിക്കുമെന്നാണ് റിപ്പോര്‍ട്ട്.
ജില്ലാഭരണകൂടം തീരപ്രദേശങ്ങളിലേക്കുള്ള സഞ്ചാരം നിയന്ത്രിച്ചട്ടുണ്ട്. ഡിസംബര്‍ മൂന്ന് മുതല്‍ ഏഴ് വരെയാണ് നിയന്ത്രണം ഏര്‍പ്പെടുത്തിയിരിക്കുന്നത്. ഉത്തരവ് ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് പുതുച്ചേരി ജില്ലാ മജിസ്‌ട്രേറ്റ് വ്യക്തമാക്കി. ശക്തമായ മഴയ്ക്ക് സാദ്ധ്യതയുള്ളതിനാല്‍ ഇന്നും തമിഴ്‌നാട് ,പുതുച്ചേരി,കാരക്കല്‍ എന്നിവിടങ്ങളില്‍ കാലാവസ്ഥാ വകുപ്പ് ഓറഞ്ച് അലര്‍ട്ട് പ്രഖ്യാപിച്ചട്ടുണ്ട്.
കുടാതെ ബംഗാള്‍ ഉള്‍ക്കടലില്‍ വീശിയടിക്കുന്ന മൈചോങ് ചുഴലിക്കാറ്റ് ചൊവാഴ്ച്ച ഉച്ചയോടെ 100 കിലോമീറ്റര്‍ വേഗതയില്‍ ആന്ധ്രയിലെ നെല്ലുരിനും മച്ചിലിപട്ടണത്തിനും കരയില്‍ പ്രവേശിക്കുമെന്നും. മുന്നറിയിപ്പില്‍ പറയുന്നു.
ചുഴലിക്കാറ്റ് നിലവില്‍ തെക്ക് പടിഞ്ഞാറ് ബംഗാള്‍ ഉള്‍ക്കടലിന് മുകളിലാണ്. എന്നാല്‍ അത് വടക്ക് പടിഞ്ഞാറ് ദിശയിലേക്ക് നീങ്ങുകയും ശക്തി പ്രാപിച്ച് തിങ്കാളാഴ്ച്ച ഉച്ചയോടെ തെക്കന്‍ ആന്ധ്രയിലും അതിനോട് ചേര്‍ന്നുള്ള വടക്കന്‍ തമിഴ്‌നാട് തീരങ്ങളിലും പശ്ചിമ ബംഗാള്‍ ഉള്‍ക്കടലിലും എത്താന്‍ സാധ്യതയുണ്ട്.
കനത്ത മഴയെ തുടര്‍ന്ന് വ്യാസര്‍പടിക്കും ബേസില്‍ ബ്രിഡ്ജിനും ഇടയിലുള്ള പാലത്തില്‍ ജലനിരപ്പ് ഉയര്‍ന്നു. അതിനെ തുടര്‍ന്ന് ചെന്നൈ സെന്‍ട്രലില്‍ നിന്നുള്ള പതിനൊന്ന് എക്‌സ്പ്രസ് ട്രെയിനുകളും റദ്ദാക്കി.
