ന്യൂഡൽഹി: ഭരണഘടനയുടെ 370-ാം അനുച്ഛേദം റദ്ദാക്കിയ കേന്ദ്രസർക്കാരിന്റെ തീരുമാനം ശരിവച്ച സുപ്രീം കോടതിയുടെ വിധിയിൽ പ്രതികരിച്ച് കേന്ദ്ര മന്ത്രി അനുരാഗ് താക്കൂർ. ജമ്മു- കശ്മീർ പൂർണമായി ഇന്ത്യയുടെ ഭാഗമാകുന്നത് സ്വപ്‌നം കണ്ട എല്ലാവരുടെയും വിജയമാണിതെന്നും ആഘോഷിക്കേണ്ട നിമിഷമാണിതെന്നും അ‌ദ്ദേഹം പറഞ്ഞു. പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള എൻഡിഎ സർക്കാർ ഭരണഘടനയുടെ ആർട്ടിക്കിൾ 370, 35 എ റദ്ദാക്കിയ നടപടി ശരിവച്ച സുപ്രീം കോടതി വിധിയിൽ ഭാരതത്തിലെ ജനങ്ങൾ മതിമറന്നിരിക്കുകയാണെന്നും അ‌ദ്ദേഹം ട്വിറ്ററിൽ കുറിച്ചു.
കശ്മീരിനെ പൂർണമായി ഭാരതത്തിന്റെ ഭാഗമാക്കുന്നതിന് വേണ്ടി പോരാടിയവരുടെ വിജയമാണ് ഇത്. ഈ നേട്ടത്തിൽ പ്രധാനമന്ത്രി നരേന്ദ്ര മോദിക്കും അ‌ദ്ദേഹം അ‌ഭിനന്ദനമറിയിച്ചു. ‘ഏക് പ്രധാൻ, ഏക് നിഷാൻ, ഏക് വിധാൻ’ എന്നതില്ലാതെ ഭാരതത്തിന്റെ ഏകീകരണം ഒരിക്കലും പൂർത്തിയാകില്ല. ഒടുവിൽ ഈ ലക്ഷ്യം സാക്ഷാത്കരിച്ചു.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ സമാധാനവും സമൃദ്ധിയും തിരിച്ചുവരുന്നു. ജനങ്ങൾ തീവ്രവാദത്തെ തള്ളിക്കളഞ്ഞു. ഭൂതകാലത്തിൽ നഷ്ടപ്പെട്ട ഭാരതത്തിന്റെ മഹത്വവും ഭൂപ്രദേശവും പുനഃസ്ഥാപിക്കാൻ അ‌ദ്ദേഹത്തിന് കഴിയുമെന്ന് രാജ്യം വിശ്വസിക്കുന്നു. ജയതു ഭാരത്’- അ‌ദ്ദേഹം കുറിച്ചു.
Discussion about this post