ആലപ്പുഴ: നവകേരള സദസ് കണക്കിലെടുത്ത് കായംകുളത്ത് ഇറച്ചിക്കടകൾ മൂടിയിടണമെന്ന് നഗരസഭ ആരോഗ്യ വിഭാഗത്തിന്റെ നിർദേശം. വേദിക്ക് അൻപത് മീറ്റർ അകലെയുള്ള ഇറച്ചി മാർക്കറ്റിലെ വ്യാപാരികൾക്കാണ് നിർദേശം നൽകിയിരിക്കുന്നത്. സർക്കാരിന്റെ നിർദേശത്തിനെതിരെ കടുത്ത പ്രതിഷേധം രേഖപ്പെടുത്തുകയാണ് വ്യാപാരികൾ.
ഡിസംബർ 16നാണ് കായംകുളത്ത് മുഖ്യമന്ത്രി പങ്കെടുക്കുന്ന നവകേരള സദസ്. നവകേരള സദസ് നടക്കുന്ന സമയത്ത് ഇറച്ചിക്കടകൾ പ്രവർത്തിക്കാൻ പാടില്ലെന്ന് മാത്രമല്ല സമീപത്തെ ഹോട്ടലും അടച്ചിടണം. തട്ടുകടക്കാരുടെ വണ്ടികൾ മാറ്റാനും നിർദേശം നൽകിയിട്ടുണ്ട്.
പാചക വാതകം ഉപയോഗിക്കുന്നത് കൊണ്ടാണ് ഹോട്ടലുകൾ പ്രവർത്തിപ്പിക്കേണ്ട എന്ന നിർദേശം നൽകിയിരിക്കുന്നത് എന്നാണ് അധികൃതർ നൽകുന്ന വിശദീകരണം.
അതേസമയം ഏറ്റുമാനൂരില്‍ നവകേരള സദസ് നടക്കുന്ന വേദിക്കു സമീപത്തുള്ള കടകൾ അടച്ചിടാനുള്ള നിർദേശം പ്രതിഷേധങ്ങൾക്ക് കാരണമായിരുന്നു. രാവിലെ 6 മുതല്‍ പരിപാടി തീരും വരെ അടച്ചിടാനായിരുന്നു നിര്‍ദേശം. കോവില്‍ പാടം റോഡ്, പാലാ റോഡ് എന്നിവിടങ്ങളിലെ വ്യാപാരികള്‍ക്കാണ് ഇതുമായി ബന്ധപ്പെട്ട് പൊലീസ് നോട്ടീസ് നല്‍കിയത്. കടകള്‍ അടച്ചില്ലെങ്കില്‍ ഉണ്ടാകുന്ന ക്രമസമാധാന പ്രശ്‌നങ്ങള്‍ക്ക് കടയുടമകള്‍ ഉത്തരവാദികളായിരിക്കുമെന്നും നോട്ടീസിൽ പറഞ്ഞിരുന്നു.
Discussion about this post