ബെയ്ജിംഗ് : ചൈനയിലെ ബെയ്ജിംഗിൽ ട്രെയിനുകൾ തമ്മിൽ കൂട്ടിയിടിച്ച് അപകടം. അപകടത്തെ തുടർന്ന് 515 പേർക്ക് പരിക്കേറ്റു. ഇവരിൽ 100ലേറെ പേരുടെ പരിക്ക് ഗുരുതരമാണെന്ന് ചൈനീസ് മാദ്ധ്യമങ്ങൾ റിപ്പോർട്ട് ചെയ്തു. മഞ്ഞുവീഴ്ചയാണ് ട്രെയിൻ അപകടത്തിന് കാരണമായതെന്നാണ് ചൈനീസ് സർക്കാർ വ്യക്തമാക്കുന്നത്.
മുന്നിലുള്ള ട്രെയിൻ എമർജൻസി ബ്രേക്ക് ഇടേണ്ടി വന്നതാണ് അപകടത്തിന് കാരണമെന്ന് ബെയ്ജിംഗിലെ മുനിസിപ്പൽ ട്രാൻസ്പോർട്ട് കമ്മീഷൻ നടത്തിയ പ്രസ്താവനയിൽ അറിയിച്ചു. ചരിഞ്ഞ ഭാഗത്ത് നിന്ന് വന്ന ട്രെയിൻ ബ്രേക്ക് ചെയ്യുന്നതിൽ പരാജയപ്പെട്ടു. ഇതോടെ രണ്ട് ട്രെയിനുകളും കൂട്ടിയിടിക്കുകയായിരുന്നുവെന്നും ട്രാൻസ്പോർട്ട് കമ്മീഷൻ വ്യക്തമാക്കി.
പരിക്കേറ്റവരിൽ ഏതെങ്കിലും വിദേശികളുണ്ടോയെന്ന് ഉദ്യോഗസ്ഥർ അന്വേഷിക്കുന്നുണ്ടെന്ന് ചൈനയുടെ വിദേശകാര്യ മന്ത്രാലയ വക്താവ് മാവോ നിംഗ് അറിയിച്ചു. പരിക്കേറ്റവരിൽ 400 ഓളം പേരുടെ നില ഗുരുതരമല്ലെന്നും നൂറിലേറെ പേർക്ക് എല്ലുകൾക്ക് പൊട്ടൽ ഉള്ളതായും അദ്ദേഹം വ്യക്തമാക്കി. വടക്കൻ ചൈനയിൽ കനത്ത മഞ്ഞുവീഴ്ച തുടരുന്നതിനാൽ ജനങ്ങൾ പുറത്തിറങ്ങാതെ വീടിനുള്ളിൽ തന്നെ കഴിയണമെന്ന് സർക്കാർ ആവശ്യപ്പെട്ടു.
Discussion about this post