ന്യൂഡൽഹി : അറബിക്കടലിൽ ഇന്ത്യൻ തീരത്തിന് അടുത്ത് വച്ച് ചരക്ക് കപ്പലിന് നേരെ ഡ്രോൺ ആക്രമണം. സൗദി അറേബ്യയിൽ നിന്നും ക്രൂഡ് ഓയിലുമായി യാത്ര ചെയ്യുകയായിരുന്നു ചരക്ക് കപ്പലിന് നേരെയാണ് ആക്രമണം ഉണ്ടായത്. കപ്പലിൽ 20ഓളം ഇന്ത്യൻ ജീവനക്കാർ അടക്കം നിരവധി പേർ കുടുങ്ങിക്കിടക്കുകയാണ്.
ചരക്ക് കപ്പലിന് നേരെയുണ്ടായ ഡ്രോൺ ആക്രമണം പൊട്ടിത്തെറിക്കും തീപിടുത്തത്തിനും കാരണമായിട്ടുണ്ട്. കോസ്റ്റ് ഗാർഡിന്റെ കപ്പലായ ഐസിജിഎസ് വിക്രം ആക്രമണം നടന്ന ചരക്ക് കപ്പലിന് അടുത്തേക്ക് തിരിച്ചിട്ടുണ്ട്. നിലവിൽ ആളപായമൊന്നും റിപ്പോർട്ട് ചെയ്തിട്ടില്ല.
നിലവിൽ ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. ഇസ്രയേൽ-ഹമാസ് യുദ്ധത്തെത്തുടർന്ന് ഇറാൻ പിന്തുണയുള്ള ഹൂതികൾ വിവിധ രാജ്യങ്ങളുടെ കപ്പലുകൾക്ക് നേരെ ഡ്രോൺ, മിസൈൽ ആക്രമണങ്ങൾ നടത്തിയിരുന്നു. സൗദി അറേബ്യൻ കപ്പലിന് നേരെ ഉണ്ടായ ആക്രമണത്തിന് കാരണം ഹൂതികൾ ആണോ എന്നുള്ളത് വിദഗ്ദ്ധ അന്വേഷണത്തിനു ശേഷമേ വ്യക്തമാകൂ എന്നാണ് അധികൃതർ അറിയിക്കുന്നത്.
Discussion about this post