ലക്നൗ: അയോദ്ധ്യയിൽ എത്തിയ പ്രധാനമന്ത്രിയെ വരവേറ്റ് രാമജന്മഭൂമി- തർക്ക മന്ദിരം കേസിലെ മുൻ അന്യായക്കാരൻ. അഭിഭാഷകനും കേസിലെ മുഖ്യപരാതിക്കാരനുമായിരുന്ന ഇഖ്ബാൽ അൻസാരിയാണ് പ്രധാനമന്ത്രിയെ സ്വീകരിച്ചത്. ഇഖ്ബാലിന് പുറമേ കേസിൽ കക്ഷികളായിരുന്ന മറ്റ് പ്രദേശവാസികളും പ്രധാനമന്ത്രിയെ സ്വീകരിക്കാൻ എത്തിയിരുന്നു.
പ്രധാനമന്ത്രിയുടെ വാഹനത്തിന് നേരെ പുഷ്പവൃഷ്ടി നടത്തിയായിരുന്നു ഇഖ്ബാൽ അൻസാരിയും മറ്റുള്ളവരും സ്വീകരിച്ചത്. അയോദ്ധ്യയിൽ രാമക്ഷേത്രം നിർമ്മിക്കുന്നതിനെ എതിർത്ത് രംഗത്ത് എത്തിയ പൗരപ്രമുഖരും പ്രധാനമന്ത്രിയെ കാണാൻ എത്തിയിരുന്നു. പ്രധാനമന്ത്രിയെ സ്വീകരിക്കേണ്ടത് തങ്ങളുടെ ഉത്തരവാദിത്വമാണെന്ന് സംഭവത്തിൽ ഇഖ്ബാൽ അൻസാരി പ്രതികരിച്ചു.
അയോദ്ധ്യ എന്നത് എല്ലാവരുടെയും മണ്ണാണ്. പ്രധാനമന്ത്രി തങ്ങളുടെ മണ്ണിൽ എത്തിയിരിക്കുന്നു. അദ്ദേഹം തങ്ങളുടെ അതിഥിയാണ്. സ്വാഭാവികമായും അദ്ദേഹത്തെ സ്വാഗതം ചെയ്യുക തങ്ങളുടെ ഉത്തരവാദിത്വമാണെന്നും അൻസാരി പറഞ്ഞു.
പുതുതായി നിർമ്മാണം പൂർത്തിയായ മഹർഷി വാൽമീകി വിമാനത്താവളം ഉദ്ഘാടനം ചെയ്യുന്നതിനും വിവിധ വികസന പദ്ധതികൾ ഉദ്ഘാടനം ചെയ്യുന്നതിനും വേണ്ടിയാണ് പ്രധാനമന്ത്രി അയോദ്ധ്യയിൽ എത്തിയത്. ഇതിന് ശേഷം അദ്ദേഹത്തിന്റെ റോഡ് ഷോയും ഉണ്ടായിരുന്നു. നിരവധി പേരാണ് അദ്ദേഹത്തെ കാണാൻ തടിച്ച് കൂടിയത്.
