ചെന്നൈ:പ്രധാനമന്ത്രി നരേന്ദ്ര മോദി തമിഴ്നാട് തിരുച്ചിറപ്പള്ളിയിലെത്തി. തമിഴ്നാട് മുഖ്യമന്ത്രി എംകെ സ്റ്റാലിന്, ഗവര്ണര് ആര്എന് രവി എന്നിവര് പ്രധാനമന്ത്രിയെ സ്വീകരിച്ചു. രണ്ട് ദിവസത്തെ സന്ദര്ശനത്തിനായാണ് പ്രധാനമന്ത്രി നരേന്ദ്ര മോദി തമിഴ്നാട് , ലക്ഷദ്വീപ്, കേരളം എന്നിവിടങ്ങളിലേക്ക് എത്തുന്നത്.
അദ്ദേഹം , റെയില്, റോഡ്, എണ്ണ എന്നിവയുമായി ബന്ധപ്പെട്ട 19,850 കോടിയിലധികം രൂപയുടെ ഒന്നിലധികം വികസന പദ്ധതികള് രാഷ്ട്രത്തിന് സമര്പ്പിക്കുകയും തറക്കല്ലിടുകയും ചെയ്യും. തിരുച്ചിറപ്പള്ളി ഭാരതിദാസന് സര്വകലാശാലയുടെ 38-ാമത് ബിരുദദാന ചടങ്ങില് അദ്ദേഹം മുഖ്യാതിഥിയാകും.
ട്രിച്ചി വിമാനത്താവളത്തിന്റെ പുതിയ ടെര്മിനല് കെട്ടിടത്തിന്റെ ഉദ്ഘാടനവും പ്രധാനമന്ത്രി നിര്വഹിക്കും. 1100 കോടിയിലധികം രൂപ ചിലവഴിച്ചാണ് പുതിയ ടെര്മിനല് കെട്ടിടം വികസിപ്പിച്ചിരിക്കുന്നത്. പുതിയ അന്താരാഷ്ട്ര ടെര്മിനലിന് പ്രതിവര്ഷം 44 ലക്ഷത്തിലധികം യാത്രക്കാര്ക്കും തിരക്കുള്ള സമയങ്ങളില് ഏകദേശം 3,500 പേര്ക്കും സേവനം നല്കാനുള്ള ശേഷിയാണ് ലക്ഷ്യം വെയ്ക്കുന്നത്.
തിരുച്ചിറപ്പള്ളിയുടെ സാംസ്കാരിക സ്പന്ദനത്തില് നിന്ന് പ്രചോദനം ഉള്ക്കൊണ്ടാണ് പുതിയ ടെര്മിനല് കെട്ടിടം രൂപകല്പന ചെയ്തിരിക്കുന്നത്. കോലം മുതല് ശ്രീരംഗം ക്ഷേത്രത്തിന്റെ നിറങ്ങള് വരെയുള്ള കലാരൂപങ്ങളും ലോകത്തിന്റെ മറ്റു ഭാഗങ്ങളുമായുള്ള ബന്ധവും പുതിയ ടെര്മിനല് കെട്ടിടത്തില് ചിത്രീകരിക്കുമെന്നാണ് പിഎംഒ പുറത്തിറക്കിയ പ്രസ്താവനയില് പറയുന്നത്.
പ്രധാനമന്ത്രിയുടെ വരവിന് മുന്നോടിയായി ട്രിച്ചിയിലെ റോഡുകള് ബിജെപി ബാനറുകള് കൊണ്ട് നിറഞ്ഞു. ടച്ച്ഡൗണില് അദ്ദേഹത്തിന് ഉജ്ജ്വല സ്വീകരണമാണ് നല്കുന്നത്. വരവേല്പ്പിനുള്ള വന് ഒരുക്കങ്ങള്ക്ക് പുറമെ, പ്രധാനമന്ത്രിയുടെ സന്ദര്ശനത്തിന് മുന്നോടിയായി പ്രദേശത്ത് വിപുലമായ സുരക്ഷയാണ് ഏര്പ്പെടുത്തിയിരിക്കുന്നത്.
Discussion about this post